एनपिएलमा ओमानका कप्तान अकिव इलियाज विराटनगर किंग्सबाट खेल्ने

विराटनगर । ओमानको राष्ट्रिय क्रिकेट टोलीका कप्तान अकिव इलियाज आसन्न नेपाल प्रिमियर लिग (एनपीएल) मा विराटनगर किंग्सबाट खेल्ने भएका छन् ।

विराटनगर किंग्सले आफ्नो फेसबुक पेजमार्फत इलियाजको आवद्धता आइतबार सार्वजनिक गरेको हो । गत जुनमा भएको विश्वकपमा ओमानले इलियाजकै कप्तानीमा राष्ट्रिय टोली उतारेको थियो । 

आगामी नोभेम्बर ३० अर्थात मंसिर १५ बाट एनपिएल सुरु हुँदैछ । विराटनगर किंग्सले इलियाजको संलग्नतालाई रोमाञ्चक कार्य भएको उल्लेख छ । 

इलियाज विराटनगर किंग्सबाट खेल्ने पहिलो विदेशी खेलाडी हुन् । विराटनगर किंग्सले अझै ३ जना खेलाडी अनुबन्धित गर्न पाउने छ ।

विराटनगरबाट लेग ब्रेकर स्पिनर सन्दीप लामिछाने मार्की खेलाडी रहेका छन् । 

विराटनगर किंग्सले अक्सनबाट लोकेश बम, प्रतिस जिसी, बसिर अहमद, राजेश पुलामी मगर, जितेन्द्रकुमार मुखिया, अनिल खरेल, दीपक बोहोरा, सुभास भण्डारी, नरेन भट्ट र मृनाल गुरुङलाई टोलीका लागि खरिद गरिसकेको छ । 

विराटनगर किंग्सका मालिक भने पूर्व क्रिकेटर एवं विराटनगरका उद्योगी पारस लुनिया हुन् ।