सेनाका भगौडाले सीआईबी बनेर धम्की दिएपछि.....

विराटनगर । नेपाली सेनाका एक जना भगौडाले नेपाल प्रहरीको केन्द्रीय अनुसन्धान ब्युरो (सीआईबी) का प्रमुखकै फोटो दुरुपयोग गरेर धम्की दिने गरेको पाइएको छ ।

विराटनगर–१ ठूलोमिल चोक निवासी ३० वर्षीय हेमकुमार खड्काले सीआईबीका अतिरिक्त प्रहरी महानिरीक्षक दीपक थापाको फोटोको दुरुपयोग गरेर आफू नै सीआईबीको कर्मचारी भएको दाबी गर्दै आएका थिए ।

उनलाई मंगलबार प्रहरीले पक्राउ गरी अनुसन्धान गर्दैछ । खड्काले ट्रु कलर एपमा थापाको नाम र फोटो राखेर बिभिन्न संस्था र ब्यक्तिहरुलाई फोन गरेको पाइएको छ ।

सीआईबीका प्रहरी उपरीक्षक होबिन्द्र बोगटीले खड्का पक्राउ परेको जनाकारी दिंदै प्रेस विज्ञप्तिमार्फत अन्य एपहरुमा पनि सीआईबीको लोगो, नाम र संकेत प्रयोग गरेर मानिसलाई धम्की दिएको पाइए प्रहरीलाई खबर गर्न आग्रह गरेका छन् ।

नेपाली सेनाको सिपाही पदबाट भागेका उनी प्रहरी सेवामा रहेका दाजुको घरमा बस्दै आएका छन् । अबिवाहित रहेका उनी दाजुको घरमै बस्दै आएको स्थानीयले बताए ।

गलत क्रियाकलापमा लागेकाले उनलाई एक पटक घरबाटै निकालिएको थियो ।

घर निकाला गरिएपछि जोगवनी गएर लागुऔषध सेवन गर्ने गरेकाले उनलाई परिवारले पुनः घरमा बोलाएको स्थानीयले बताएका छन् ।

सुध्रिन्छु भनेर परिवारलाई बचन दिएपछि उनलाई दुबई पठाइएको थियो । तर त्यहाँबाट भागेर उनी पुनः नेपाल आएका थिए । कुनै पेशा नगर्ने उनी मानिसलाई ठगेर तथा झुक्याएर लागुऔषध खाने रकम लिदै आएका थिए ।

सीआईबीको नामले मानिसहरु डराउने र मागेजति रकम दिने भएकाले उनले फोन गरेर धम्की दिन थालेका थिए । खड्काले कति जनालाई धम्क्याए र कतिबाट रकम लिए भन्ने खुलिसकेको छैन । 

मोरङ प्रहरीले अनुसन्धानका लागि अभद्र ब्यवहार मुद्दामा म्याद थप गरेको छ ।

‘उ बारे धेरै कुरा बुझ्नु पर्ने छ, कति जना पीडित भएका छन् र उसँग अरु पनि सहयोगी हुन सक्छन् भनेर अनुसन्धान गर्दैछौं’ मोरङका प्रहरी उपरीक्षक नारायणप्रसाद चिमरियाले भने ।