ढकाल समुह प्यानलै अगाडि : अजम्बर २२५, राजकुमार २०२ (ताजा मत परिणामसहित)

विराटनगर । नेकपा एमाले मोरङको १०औं जिल्ला अधिवेशनमा पदाधिकारीतर्फको मतगणनाको मध्यतिर आइपुग्न लाग्दा संस्थापन इतर रहेका उम्मेदवारहरूले अग्रता कायम राखेका छन् । सुरुवाती गणनादेखि नै उनीहरूले अग्रता लिएका हुन् ।

एमाले केन्द्रीय सल्लाहकार कमिटीका सदस्य विनोद ढकालको समर्थन पाएको इतर समूहबाट पदाधिकारीका सवै उम्मेदवारको मत अगाडि रहेको छ । 

शुक्रबार विहान प्राप्त भएको ताजा मतपरिणाम अनुसार ४३९ मत गणना सम्पन्न हुँदा ढकाल समर्थित अध्यक्षका उम्मेदवार अजम्बर राईले २२५ मत प्राप्त गरेका छन् । संस्थापन समर्थित उम्मेदवार राजकुमार ओझा २३ मतले पछाडि छन् । उनले २०२ मत प्राप्त गरेका छन् ।

उपाध्यक्षमा पनि इतर समूहकै सागर थापाले अग्रता कायम गरेका छन् । उनले २२८ मत पाउँदा उपाध्यक्षकी अर्की उम्मेदवार शान्ति लिम्बूले १८२ मत मात्रै पाएकी छन् । 

सचिवमा पनि इतर पक्षकै सोमराज थापा अगाडि छन् । उनले २३० मत प्राप्त गर्दा संस्थापन पक्षका रविन थापाले १८० मत ल्याएका छन् ।

पदाधिकारीतर्फ उपसचिवका उम्मेदवार सन्तोष वान्तवाले ठूलो अग्रता कायम गरेका छन् । वान्तवाले २३९ प्राप्त गरेका हुन् । संस्थापन पक्षका इर्जालाल राजवंशीले १६३ मत पाएका हुन् । 

पहिलो १०० मत गन्दा अगाडि देखिएकी उपसचिवकी उम्मेदवार शिल्पा निराला कार्की त्यसपछि थोरै मतान्तरले लगातार पछि परेकी छन् । उनले २०४ मत प्राप्त गरेकी छन् । इतर समुहकी उषा झाले २०७ मत प्राप्त गर्दै अगाडि छिन् । 

प्रत्येक प्रतिनिधिले पदाधिकारी, खुल्ला सदस्य, भुगोल सदस्य र युवा तथा महिला सदस्यहरूको अलग–अलग मतपत्रमा मतदान गरेका थिए । मतदान गरेपछि सवै मतपत्र एउटै मतपेटिकामा खसाउने व्यवस्था निर्वाचन कमिटीले गरेको थियो ।

पहिलो मतपेटिकामा रहेका पदाधिकारी र सदस्यहरूको सवै मतपत्र गणना गरेपछि मात्रै अर्को मतपेटिकाको मतपत्र गणना गर्ने सहमति भएको निर्वाचन कमिटीका प्रमुख निर्वाचन अधिकृत सुरेशलाल श्रेष्ठले जानकारी दिए ।

मतगणना अघि अध्यक्षसहित पदाधिकारीका उम्मेदवारहरूबीच ६ बुँदे आचारसंहितामा सहमति भएपछि गणना सुरु गरिएको हो । जसमा मतगणना स्थलमा गणना कार्यमा बाधक तथा अव्यवस्था हुने गतिविधि प्रत्यक्ष वा परोक्ष रुपमा गर्न निषेध गरिएको छ ।

बिहीबार दिउँसो अबेरबाट सुरु भएको मतगणनामा इतर पक्षका पदाधिकारीका उम्मेदवारले अग्रता बढाएसँग मतगणनास्थल एमाले मोरङ पार्टी कार्यालय पाञ्चालीबाट संस्थापन पक्षका नेता कार्यकर्ताहरूको संख्या घटेको थियो । इतर पक्षका नेता कार्यकर्ताहरू भने उत्साहित भएर पार्टी कार्यालयमा थपिएका थिए ।

बिहीबार विहान ७ बजेदेखि सुरु हुने भनिएको मतगणना ढिलासुस्तीका कारण अपरान्ह ३ बजेदेखि सुरु भएको हो । पार्टी कार्यालय पाञ्चालीमा उपस्थित भएका एमाले नेता कार्यकर्ताहरूले निर्वाचन कमिटीले तयारीमा ढिलाई गरेको आरोप लगाएका छन् । ढिलो गरी मतगणना सुरु भएको भन्दै निर्वाचन कमिटीसँग उम्मेदवारहरूले असन्तुष्टि जनाएका थिए ।

अध्यक्षसहितका उम्मेदवारहरूले पहिले एउटा मतपेटिकाको मतपत्र खन्याएर मिलाउने र त्यसलाई गणना गरेपछि अर्को मतपेटिकाको गणना गर्ने सहमति गरेका छन् ।

१६५ सदस्यीय जिल्ला कमिटी निर्वाचित गर्न ओझा र राईको नेतृत्वमा प्यानलै प्रतिष्पर्धा भएको थियो । 

निर्वाचन कमिटीका अनुसार ९११ जना अधिवेशन प्रतिनिधिहरू मतदाता कायम भएको अधिवेशनमा ८८८ जनाले (९७ प्रतिशत) मतदान गरेका थिए । २३ जना प्रतिनिधि भने मतदानमा अनुपस्थित रहेका थिए ।