दुई मोटरसाइकलका छ घाइते, उपचार कस्ले गर्ने ?

विराटनगर । दुई मोटरसाइकलमा सवार छ जना घाइते भएपछि दुर्घटना कस्ले गराएको भन्ने यकिन नहुँदा उपचारमा समस्या भएको छ । 

घाइतेमध्ये दुई जनाको अवस्था गम्भिर छ । एक पक्षले दुर्घटना गराउने मोटरसाइकल धनीले उपचार गराउनुपर्ने र अर्को पक्षले बढी क्षति भएकालाई कम क्षति भएकाले उपचार गराउनुपर्ने अडान राखेपछि उपचारमा समस्या भएको हो । 

मोरङ कटहरी ४ नयाँ बजारमा गत शुक्रबार राति  को २५ प ३३१५ नम्बरको मोटरसाइकललाई को ३९ प ७०५७ नम्बरको मोटरसाइकलले ठक्कर दिएको थियो ।

दुबै मोटरसाइकलमा गरी छ जना सवार थिए । को २५ प ३३१५ नम्बरको मोटरसाइकलमा मोरङ धनपालथान ६ का ३८ वर्षीय देवशरण मण्डल, उनकी चार वर्षीया छोरी र भाइ सवार थिए । 

मोटरसाइकल चालक मण्डल गम्भीर र उनकी छोरी र भाइ सामान्य घाइते भएको प्रहरीले बताएको छ । 

प्रहरीका अनुसार सडक क्रस गर्ने क्रममा तीन जना सवार को ३९ प ७०५७ नम्बरको मोटरसाइकल अर्कोमा ठोक्किएको थियो ।

दोस्रो मोटरसाइकलको पछाडि बसेका जहदा ४ का २८ वर्षीय रामजी सिंहको अवस्था गम्भीर र अन्य दुई सामान्य घाइते भएका थिए । 

सिंहको विराट नर्सिङ होम र मण्डलको जीवन विकास सामुदायिक अस्पतालमा उपचार भैरहेको छ । 

उनीहरुको अस्पतालको उपचार लामो चल्ने बताइएको छ ।

मण्डल पक्षले दुर्घटना गराउनेले उपचार र कारवाही भोग्नुपर्ने माग गर्दै प्रहरीमा निवेदन दिएको छ । 

सिंह पक्षले भने आफ्नो घाइते बढी गम्भीर भएकाले मण्डल पक्षले उपचार गराउनुपर्ने माग राख्दै आएको छ । दुबै पक्षबीच सहमति नहु“दा कारवाहीको माग गर्दै अदालतसम्म जाने अवस्था आएको मण्डलका आफन्त काशीराम मण्डलले बताए ।

मण्डल पक्षले तीन युवा सवार मोटरसाइकलमा मादकपदार्थ सेवन गरेर र बोकेर सडक पार गर्ने क्रममा दुर्घटना भएको दाबी गरेको छ । 

मादक पदार्थ सेवन गरेर चलाएको मोटरसाइकल तीब्र गतिमा रहेकाले मोटरसाइकल दुर्घटना भएको स्थानीयको आरोप छ । 

प्रहरीले भने घटनास्थल प्रकृति मुचुल्का तयार गरेपछि मात्रै दुर्घटनाको कारण खुल्ने बताएको छ ।