एमाले मोरङको  १०औं अधिवेशन : मतगणना बिहीबार विहानदेखि

विराटनगर । नेकपा एमाले मोरङको नयाँ नेतृत्व चयनका लागि बुधबार मतदान सम्पन्न भएपछि आज बिहीबार मतगणनाको तयारी अघि बढेको छ । 

मतगणना एमाले मोरङको पार्टी कार्यालय पाञ्चालीमा हुने जनाइएको छ । बुधबार साँझ होटल मनास्लु इनमा मतपेटिका सिलबन्दी गरी विराटनगर–१२ पाञ्चालीस्थित एमाले मोरङको पार्टी कार्यालयमा लगिएको थियो ।

अध्यक्षसहित पदाधिकारीका उम्मेदवारहरू र निर्वाचन कमिटीबीच आज विहान ९ बजेदेखि पार्टी कार्यालयमा मतगणना गर्ने सहमति भएको हो ।

दुई दिनमा सम्पन्न हुने भनिएको नेकपा एमाले मोरङको १० औं जिल्ला अधिवेशनबाट नयाँ नेतृत्व चयन गर्न थप दुईदिन लाग्दा समेत निर्वाचनको प्रक्रिया टुङ्गिन सकेन । उद्घाटनदेखि नै समय तालिकामा चुकेका कारण अधिवेशनबाट नयाँ नेतृत्व चयनको प्रक्रिया लम्बिएको हो ।

निर्वाचन प्रक्रिया लम्ब्याउन पार्टी नेताहरूकै संलग्नता रहेको अधिवेशनस्थलमा उपस्थित प्रतिनिधिहरूले टीकाटिप्पणी गर्न भ्याए ।

शनिबारबाट अधिवेशन सुरु भएको थियो । सोमबारसम्म निर्वाचनको स्पष्ट कार्यक्रम अघि नबढ्दा प्रतिनिधिहरूले निराशा व्यक्त गरेका थिए । 

मंगलबार मनोनयन दर्ताकै लागि दिनभरको समय गुज्रियो । सर्वसम्मत नेतृत्व व्यवस्थापनको प्रयास असफल भएपछि बुधबार प्रतिनिधिहरूकै दवावमा निर्वाचन सम्पन्न भएको छ ।

१६५ सदस्यीय जिल्ला कमिटी चयन गर्न भएको निर्वाचनमा पनि तोकिएको समयमा सुरु भएन । 

बुधबार विहान ७ बजेबाट मतदान सुरु हुने निर्वाचन कमिटीले घोषणा गरेपनि साढे ९ बजेमात्रै पहिलो मत खसेको थियो ।

जिल्ला अधिवेशन स्थल विराटनगरको बरगाछीस्थित होटल मनास्लु इनमा ढिलो मतदान सुरु हुँदा मतदान सम्पन्न नहुन्जेल पर्यो । अपरान्ह ४ बजेसम्म हुने भनिएको मतदानको समय धकेलिएर साढे ६ बजेसम्म पुगेको थियो । निर्वाचन कमिटीका अनुसार ९११ जना अधिवेशन प्रतिनिधिहरूले मतदान गर्ने अधिवेशनमा ८८८ जनाले (९७ प्रतिशत) मतदान गरेका छन् । २३ जना प्रतिनिधि मतदानमा अनुपस्थित भएका हुन् । 

मतदानमा सहभागी प्रतिनिधिहरूलाई न्यूनतम् १३ मिनेटदेखि २५ मिनेटसम्म मत खसाल्न समय लागेको थियो । जसका कारण मतदानमा समय लाग्ने भएको भन्दै निर्वाचन कमिटीले तोकिएको २२ वटा मतदान बुथलाई बढाएर २८ वटा बनाएर निर्वाचन सम्पन्न गरेको हो ।

निर्वाचनमा एमालेका केन्द्रीय नेतृत्वको हवला दिइएको संस्थापन पक्षबाट राजकुमार ओझा र संस्थापनको इच्छा विपरित उभिएका विनोद ढकाल पक्षबाट अजम्बर राईको नेतृत्वमा प्यानलै उम्मेदवारहरू प्रतिष्पर्धामा उत्रिएका छन् । उनीहरूले मतदान स्थलमा आ–आफ्नो प्यानलबाट ‘लिष्ट’ बाँडेर प्रतिष्पर्धामा उत्रिएका हुन् । 

मत माग्ने क्रममा दुवैतिरका समर्थकहरूले आफ्नो प्यानलका लागि नारा लगाएर मत मतदाताको ध्यानाकृष्ट गरेका थिए ।

ओझाको प्यानलबाट उपाध्यक्षमा शान्ति लिम्बू, सचिवमा रविन थापा तथा दुई उपसचिवमा इर्जालाल राजवंशी र शिल्पा निराला कार्की उम्मेदवार छन् । 

त्यस्तै इतर समूहको नेतृत्व गरेका राईको नेतृत्वमा उपाध्यक्ष सागर थापा, सचिव सोमराज थापा, उपसचिवद्वय सन्तोष बान्तवा र उषा झा उम्मेदवार बनेका छन् ।

दुवै प्यानलले सदस्यहरूको समेत प्यानलै खडा गरेका थिए । जसमा २० जना बढी उम्मेदवार भने दुवैतिरको प्यानलमा देखिएका हुन् । दुवै प्यानलले आफ्नो पक्ष बलियो भएको दाबी गरेका छन् ।

अध्यक्षसहितका पाँच पदाधिकारीमा दुई प्यानलबाट १० जनाको उम्मेदवारी परेको थियो । सदस्यतर्फ हल खुलातर्फको १० सिटमा २४ जनाको उम्मेद्वारी परेको हो । 

त्यस्तै समावेशी क्षेत्रतर्फ २४ सिटका लागि ३९ जनाको उम्मेदवारी रहेको छ । भूगोलतर्फको ५६ सिटमा १११ जना उम्मेदवार  छन् । 

अधिवेशनमा ३ सय २५ जनाले मनोनयन दर्ता गरेका थिए । तीमध्ये ७१ जना निर्विरोध निर्वाचित भएका छन् । सदस्यतर्फ ६३ जनाले उम्मेदवारी फिर्ता लिएको जनाइएको छ ।