आर्मीलाई दुई गोलले हराउँदै विराट गोल्डकपमा एनआरटी क्वार्टरफाइनल प्रवेश

विराटनगर । न्युरोड टिम एनआरटी आठौं संस्करणको विराट गोल्डकप फुटबल प्रतियोगिताको क्वार्टरफाइनलमा पुगेको छ । 

विराटनगरको सहिद रङ्गशालामा शुक्रबार भएको रात्रिकालीन गोल्डकपमा विभागीय टिम त्रिभुवन आर्मी क्लबलाई २–० गोलले पराजित गर्दै एनआरटी क्वार्टरफाइनलमा पुगेको हो । शनिबार तय भएको इटहरी गोल्डकपको फाइनल खेल्न लागेको आर्मी अघिल्लो दिन विराट गोल्डकपमा एनआरटीसँग स्तब्ध बनेको हो ।

जितसँगै एनआरटीले आइतबार दोस्रो क्वाटरफाइनल खेलमा भारतको सिक्किम ड्र्यागनसँग प्रतिस्पर्धा गर्नेछ । जितको लागि एनआरटीका विदेशी खेलाडी रिचार्ड र अफिज ओलावाले गोल गरेका थिए । खेलको पहिलो हाफको २६ औं मिनेटमा एनआरटीका रिचार्डले गोल गरी टिमलाई अग्रता दिए ।

अफिजले निकालिदिएको क्रस पासलाई रिचार्डले डिबक्स भित्रबाट गरेको प्रहारले जाली चुमेको थियो । पहिलो हाफमा १–० गोलले अग्रता लिएको एनआरटीले दोस्रो हाफको ७५ औं मिनेटमा अफिजले गोल गरी टिमको जित सुनिश्चित गरे ।

डिबक्सभित्र वैकल्पिक खेलाडी सुदीप श्रेष्ठले निकालिदिएको पासलाई अफिजले हेडिङ गरेको बललाई आर्मीका गोलकिपर समित श्रेष्ठले पञ्च गरेर नियन्त्रणमा लिन नसक्दा आकर्षक गोल भयो ।

आर्मीले खेल सुरु भएको ६  मिनेटमा गोल गर्ने अवसर गुमायो । टोलीका दिनेश हेमजुङको कडा प्रहार एनआरटीका गोलकिपर प्रमिजय गच्छदारले उत्कृष्ट बचाए । आर्मीका जिलेस्पीजंग कार्कीले १३ औं मिनेटमा ३० यार्डदेखिको कडा प्रहार पनि एनआरटीका किपर गच्छदारले नियन्त्रणमा लिँदै गोल हुनबाट जोगाएका थिए ।

त्यस लगत्तै दिनेशले बिट भइसकेको अवस्थामा बललाई सही दिशा दिन सकेनन् । १६ औं मिनेटमा एनआरटीका जय गुरुङले आर्मीका डिफेन्डरलाई क्रस गरेर पेनाल्टी एरियाबाट गरेको प्रहार गोल गर्न चुेक ।

४० औं मिनेटमा जय गुरुङले निकालिदिएको  वान भर्सेस वानको प्रहार एनआरटीका रिचार्डले  गोल गने अवसर गुमाएका थिए । त्यस लगत्तै उनको प्रहार आर्मीका गोलरक्षक समित श्रेष्ठबाट डिफ्लेक्ट हुँदै बाहिरियो ।

दोस्रो हाफबाट आर्मीले आक्रामक खेल पस्किए पनि गोलमा परिणत गर्न नसक्दा घर फर्किन बाध्य भयो  । ५२ औं मिनेटमा  जिलेस्पीको हेड पोस्टमाथिबाट बाहिरिँदा आर्मीले बराबरीमा ल्याउन  सकेन ।

६५ औं मिनेटमा एनआरटीका सञ्जीव विष्टले वान भर्सेज वानको प्रहार पोस्ट माथिबाट जाँदा थप गोल गर्ने अवसर खेर फाले । ७३ औ मिनेटमा आर्मीका युद्ध शाहीले निकालिदिएको पास जिलेस्पीले डिबक्सभित्र बल नियन्त्रणमा लिन नसक्दा गोल गर्नबाट चुक्यो । ८६ औं मिनेटमा आर्मीका निरजले बल एक्लै अगाडि बढाएर डि-बक्स भित्रबाट एनआरटीका गोलरक्षकलाई बिट गर्न नसक्दा गोल गर्ने राम्रो अवसर गुमाएका थिए ।

हारपछि आर्मीका प्रशिक्षक मेघराज केसीले पाएको अवसर खेलाडीहरूले चुकाउँदा हार ब्यहोर्नु परेको बताए । ‘नियमित खेलहरू भइरहेको कारणले हामीले धेरै नयाँ खेलाडीहरू छन् । राम्रै खेल्दाखेल्दै पनि पाएको अवसर चुकाउँदा हार्नुपर्यो,’ उनले भने ।

जितपछि एनआरटीका सहायक प्रशिक्षक आशिष थापामगरले खेलाडीको राम्रो टिमवर्क भएकोले नतिजा आफ्नो पक्षमा पार्न सफल भएको बताए । ‘केटाहरूले धेरै मेहनत गर्दा नतिजा राम्रो आएको छ,’ उनले भने, ‘क्वाटरफाइनमा थप नयाँ खेलाडी राख्नेछौं ।’

प्लेरअफ द म्याच एनआरटीका अफिज ओलावाले घोषित भए । उनले नगद ११ हजार रुपैयाँ पाए ।

शनिबार पहिलो क्वाटरफाइनल खेलमा घरेलु टिम सांग्रिला मोरङ फुटबल क्लब र भुटानको आरटीसीबीच हुनेछ ।