उद्‌घोषकर्मी रिमाल पत्रकार महासंघको केन्द्रीय सदस्यमा निर्वाचित

विराटनगर । नेपाल पत्रकार महासंघको केन्द्रीय सदस्यमा कमल रिमाल निर्वाचित भएका छन् । उद्घोष दैनिकका सहसम्पादक रिमालले ५२७ मत प्राप्त गर्दै केन्द्रीय सदस्यमा निर्वाचित भएका हुन् । 

महासंघको आइतबार राति सार्वजनिक अन्तिम मतपरिणाम अनुसार रिमालले कोशी प्रदेश भूगोलबाट पहिलो मत प्राप्त गरेका छन् । 

त्यसैगरी कोशी प्रदेशबाटै शंकर खरेलले ४४२ मत प्राप्त गरी केन्द्रीय सदस्यमा निर्वाचित भएका छन् । रिमाल र खरेल दुवै प्रेस चौतारी नेपाल र नेपाल प्रेस युनियनको प्यानलबाट केन्द्रीय सदस्य बनेका हुन् ।

महासंघको केन्द्रीय अध्यक्षमा निर्मला शर्मा निर्वाचित भएकी छन् । शर्मा पत्रकार महासंघमा पहिलो महिला अध्यक्ष बनेकी हुन् । उनीसँगै महासंघको केन्द्रीय समितिमा १३ जना महिला पत्रकार निर्वाचित भएका छन् ।

शर्मा प्रेस चौतारी–प्रेस युनियनको प्यानलबाट केन्द्रीय अध्यक्षमा निर्वाचित भएकी हुन् । 

उनले ४ हजार २८२ मत प्राप्त गरिन् । अध्यक्षकै प्रतिष्पर्धीहरू मध्ये रमेश बिष्टले ३ हजार २०३ मत प्राप्त गरेका छन् । त्यस्तै देवीप्रसाद सापकोटाले २७० र लालसिंह लामाले ९६ मत प्राप्त गरेका छन् ।