माघ ७ गते हिउँदे अधिवेशन आह्वान गर्ने प्रदेश सरकारको निर्णय

बिराटनगर । कोशी प्रदेशसभाको छैटौं तथा हिउँदे अधिवेशन माघ ७ गते बोलाउने सरकारले निर्णय गरेको छ ।

आइतबार विहान बसेको कोशी प्रदेश सरकारको मन्त्रिपरिषद् बैठकले प्रदेशसभाको हिउँदे अधिवेशन आउँदो माघ ७ गते दिउँसो २ बजेका लागि आह्वान गर्न प्रदेश प्रमुख समक्ष सिफारिस गर्ने निर्णय गरेको हो । 

प्रदेश सरकारका प्रवक्ता एवं आन्तरिक मामिला तथा कानुनमन्त्री रेवतीरमण भण्डारीले प्रदेश सभा बैठक आह्वानका लागि प्रदेश प्रमुखलाई सिफारिस गरिएको जानकारी दिए । 

सरकारले हिउँदे अधिवेशनमा कम्तिमा पनि ४ वटा विधेयक प्रदेश सभामा पठाइसक्ने तयारी गरेको छ ।

सरकारले प्रदेश सभालाई बिज्नेश अभाव हुन नदिने गरी विधेयकहरू प्रदेश सभामा लैजान लागेको जनाइएको छ । 

हिउँदे अधिवेशन बोलाउने सरकारको सिफारिससँगै प्रदेश प्रमुख परशुराम खापुङले बैठक आह्वान गर्नेछन् ।

आह्वान अनुसार प्रदेशसभा सचिवालयले बैठकका लागि आवश्यक सूचना र तयारी अघि बढाउने छ ।