भेडेटारमा ५२ केजी गाँजा बरामद भएको २४ घण्टामै बराहक्षेत्रमा एम्बुलेन्स भित्रै भेटियो करिव तीन सय केजी गाँजा

विराटनगर । दुई दिनको अवधिमा एम्बुलेन्समा लुकाएर ल्याएको  ठूलो परिमाणको गाँजासहित दुईवटा एम्बुलेन्सलाई प्रहरीले नियन्त्रणमा लिएको छ । सशस्त्र प्रहरीले सुनसरीको बराहक्षेत्र र नेपाल प्रहरीले धनकुटाको भेडेटारबाट गाजा बोकेका दुईवटा एम्बुलेन्स नियन्त्रणमा लिएका हुन् ।

नेपाल प्रहरीले शनिबार बेलुका भेडेटारमा मे १ च २०३२ नम्बरको एम्बुलेन्सबाट ५२ केजी गाजा बरामद गरेको २४ घण्टाभित्रै सशस्त्र प्रहरीले पनि एम्बुलेन्सबाटै झण्डै तीन सय किलो गाजा नियन्त्रणमा लिएको छ । 

सशस्त्र प्रहरीले सुनसरीको बराहक्षेत्र नगरपालिका– १ धर्मद्वारस्थित चतरा– धरान सडक खण्डको बगुवाबाट सूर्यकुण्ड जाने भित्री सडकमा एम्बुलेन्समा लोड गरि राखिएको अवस्थामा  २ सय ७३ किलो (९ बोरा) गाजा बरामद गरेको जनाएको छ ।

विशेष सुचनाका आधारमा आइतबार बिहानको राती सशस्त्र प्रहरी बल सुरक्षा बेस चतराबाट खटिएको टोलीले को १ च २९३७ नम्बरको एम्बुलेन्समा लोड भएको गाजा बरामद गरेको हो । 

प्रहरीलाई देखेपछि एम्बुलेन्स चालकसहित केही व्यक्तिहरू भने एम्बुलेन्स छाडेर फरार भएको जनाइएको छ ।

उक्त एम्बुलेन्स भारत सरकारबाट क्यू.जि.ई रेजिमेन्टल एशोसिएसनको नाममा अनुदान सहयोगमा प्राप्त भएको जनाइएको छ ।

उक्त गाजा भारततर्फ लैजाने तयारी रहेको प्रहरीले आशंका गरेको छ । बरामद गाजा र एम्बुलेन्सलाई आवश्यक कारबाहीका लागि इलाका प्रहरी कार्यालय महेन्द्रनगर चक्रघट्टी सुनसरीमा बुझाइएको सशस्त्र प्रहरीले जनाएको छ ।

नेपाल प्रहरीले शनिबार साँझ भेडेटारबाट एम्बुलेन्सबाटै  ५२ केजी गाँजासहित एम्बुलेन्स चालकलाई पक्राउ गरेको छ ।

प्रहरीले धनकुटाको साँगुरीगढी गाउँपालिका– ६ भेडेटारबाट एम्बुलेन्ससहित त्यसका चालक विराटनगर महानगरपलिका– ८ का ४८ वर्षीय जयदेव चेललाई पक्राउ गरेको हो ।