मुख्यमन्त्रीमा आलोपालो, चार–चार मन्त्रालय लिने सहमति

विराटनगर । नेकपा (एमाले) र नेपाली कांग्रेसले कोशी सरकारको मन्त्रालय भागबन्डाको विषय टुंग्याएका छन् । दुवै दलका नेताहरुको शनिबार काठमाडौंमा सम्पन्न बैठकले मन्त्रालय भागबन्डाको विषय टुंगो लगाएका हुन् । 

कोशीका मुख्यमन्त्री हिक्मतकुमार कार्की र काँग्रेस संसदीय दलका नेता उद्धव थापाबीचको बैठकले मुख्यमन्त्रीमा आलोपालोसहित प्रदेशमा चार–चार वटा मन्त्रालय लिने गरी सहमति गरेको बैठकमा सहभागी कांग्रेस नेताहरुले बताएका छन् । 
यी दुई दलका नेताहरुले मुख्यमन्त्री पदमा दुवै दलले आलोपालो गर्ने र त्यसको समयको निर्धारण केन्द्रीय गठबन्धन अनुसार गर्ने सहमति भएको छ ।

‘केन्द्रमा प्रधानमन्त्री फेरिएपछि प्रदेशमा पनि मुख्यमन्त्री फेरिने सहमति भएको छ’, बैठकमा सहभागी कांग्रेसका केन्द्रीय सदस्य समेत रहेका प्रदेश सभा सदस्य भीम पराजुलीले भने ‘मन्त्रालयका हकमा अहिले माओवादी मन्त्रीहरुले सम्हालेको मन्त्रालय कांग्रेसले लिने र थप एउटा मन्त्रालय पनि लिने सहमति भएको छ ।’

कोशीमा अहिले एमालेका कार्की मुख्यमन्त्री छन् भने संघमा एमाले अध्यक्ष केपी शर्मा ओली प्रधानमन्त्री छन् । यो सहमति अनुसार अब केन्द्रमा कांग्रेस सभापति शेरबहादुर देउवा प्रधानमन्त्री बनेपछि कोशीमा कांग्रेसले मुख्यमन्त्री लिनेछ ।
पराजुलीका अनुसार प्रदेशको भौतिक पूर्वाधार मन्त्रालय, वन वातावरण तथा पर्यटन मन्त्रालय, स्वास्थ्य मन्त्रालय कांग्रेसले लिने निश्चित भएको छ । यी तीन वटै मन्त्रालय यसअघि माओवादीसँग थियो । शुक्रबार मात्रै माओवादीका मन्त्रीहरुले राजीनामा दिँदै सरकार छाडेका थिए । 

कांग्रेसले यी बाहेक सामाजिक विकास र कृषि मन्त्रालयमध्ये एउटा लिने सहमति पनि भएको छ । 

‘माओवादी मन्त्रीहरुले छाडेकाबाहेक सामाजिक विकास र कृषिमध्ये एउटा मन्त्रालय लिने सहमति छ’, पराजुलीले भने ‘पछि मुख्यमन्त्री फेरिएपछि अहिले कांग्रेसले लिएका मन्त्रालय एमालेले लिने सहमति भएको छ ।’ 

प्रदेशको सामाजिक विकास मन्त्रालयमा अहिले एमालेका पाँचकर्ण राई मन्त्री छन् भने कृषि मन्त्रालय मुख्यमन्त्री आफैले राखेका थिए । अहिलेको एमालबाट मुख्यमन्त्री कार्कीसहित आर्थिक मामिला मन्त्रालय (मन्त्री राम राना), सामाजिक विकास (मन्त्री पाँचकर्ण राई), आन्तरिक मामिला तथा कानुन (लीलाबल्लभ अधिकारी) र राज्यमन्त्री सृजना राई छन् । 

एमाले र कांग्रेसबीच मन्त्रालय भागबन्डाको टुंगो लागेपछि कांग्रेसभित्र मन्त्री बन्ने दौड झनै बढ्ने निश्चित भएको छ । पराजुलीका अनुसार भागबन्डा टुंगो लागेसँगै अब केन्द्रीय नेतृत्वले मन्त्रीहरुको नाम टुंगो लगाउनेछ ।

कांग्रेस कोशीमा संस्थापन पक्षका नेताहरु अमृत अर्याल, प्रदीप सुनुवार,  हिमाल कार्की,  खगेनसिंह हाङ्गाम, डोल्मा तामाङ, सिटौला पक्षका भीम पराजुली, भूपेन्द्र राई तथा शेखर कोइराला पक्षका पनि बहुसंख्यक सांसद मन्त्री हुने दौडमा छन् ।

‘अब कांग्रेसले दुई दिनभित्रमा नाम टुंगो लगाउने सम्भावना छ’, पराजुलीले भने ।