अन्तर विद्यालय टेबल टेनिस प्रतियोगिता

विराटनगर । बीपी कोइरालाको १११औं जन्म जयन्तीको अवसरमा नेपाली कांग्रेस मोरङको खेलकूद तथा युवा विभागले आयोजना गरेको बीपी कोइराला स्मृति अन्तर विद्यालय टेबलटेनिस प्रतियोगिता सम्पन्न भएको छ । 

सो प्रतियोगितामा कक्षा ६ सम्मको क्याडेट ब्वाइज तथा क्याडेट गर्ल्स सिंगल्स, कक्षा ७–८ सम्मिलित सब–जुनियर ब्वाइज तथा सब–जुनियर गर्ल्स सिंगल्सका साथै कक्षा ९–१० सम्मिलित जुनियर ब्वाइज तथा जुनियर गर्ल्स सिंगल्सका इभेन्टहरूमा प्रतिस्पर्धा भएको थियो ।

क्याडेट गर्ल्स सिंगल्सतर्फ बुढानिलकण्ठ स्कुलकी मानसी तामाङ प्रथम, नमूना विद्या मन्दिरकी अनन्या धुत द्वितीय, श्री रविशंकरकी प्राप्ति सेढाई र स्वस्तिका चौधरी संयुक्त रूपमा तृतीय भए ।

त्यसैगरी क्याडेट ब्वाइज सिंगल्सतर्फ बुढानिलकण्ठ स्कुलका आयान श्रेष्ठ प्रथम, अरनिको स्कुलका आयुद्ध भण्डारी द्वितीय, अरनिकोका बिदर्भ गौतम र बुढानिलकण्ठकै प्रेमराज थापा तृतीय भए ।

त्यसैगरी सब–जुनियर गर्ल्स सिंगल्स्तर्फ श्री रविशंकरकी स्वाति साह प्रथम, सेन्ट मेरिजकी आस्था खड्का द्वितीय, एभरेष्ट स्कुलकी कृपा पोखरेल र सेन्ट जोसेफकी अनोखी साह संयुक्त रूपमा तेस्रो भए ।

सब–जुनियर ब्वाइज सिंगल्सतर्फ लिलिपुट स्कुलका श्रीजल प्याकुरेल प्रथम, एभरेष्टका सक्षम बस्नेत द्वितीय, रविशंकरका पीयूष यादव र बूढानीलकण्ठका रोशन रजक संयुक्त रूपमा तृतीय भए ।

यस्तै जुनियर गर्ल्स सिंगल्सतर्फ सेन्ट मेरिज स्कुलकी बिज्ञता थापा प्रथम, अपाला साह द्वितीय, सेन्ट मेरिजकै मानसी सेठिया र एभरेष्टकी प्रनिता गिरी संयुक्त रूपमा तृतीय भए । त्यसैगरी जुनियर ब्वाइज सिंगल्सतर्फ एभरेष्ट स्कुलका सुशान्त मेहता प्रथम, बूढानीलकण्ठ स्कुलका रूपेश श्रेष्ठ द्वितीय, नमूना विद्यामन्दिरका डेभिड बोहरा र लिलिपुट स्कुलका पृथकराज राई संयुक्त रूपमा तृतीय भए ।

प्रतियोगितामा नगरभित्रका १८ विद्यालयका करिब १ सय ४० विद्यार्थीहरूको सहभागिता रहेको थियो । खेलकूद तथा युवा बिभाग संयोजक प्रकाश दाहालको अध्यक्षतामा भएको समापन समारोहमा नेपाली कांग्रेस नेता महेश आचार्य, कोशी प्रदेश खेलकूद बिकास बोर्डका सदस्य सचिव पर्शुराम बस्नेत, नेपाल लोकतान्त्रिक खेलकुद संघका कोशी प्रदेश अध्यक्ष बसन्त अर्याललगायतले विजेता विद्यार्थीहरूलाइ पुरस्कार तथा प्रमाणपत्र प्रदान गरेका थिए । 

सो अवसरमा टेबलटेनिस खेलको विकासमा गरेको योगदानको कदर गर्दै पूर्व अन्तर्राट्रिय खेलाडी अनुज बानियाँ र बिकेन थापालाई सम्मान गरिएको थियो ।