करार प्रशिक्षक नियुक्तिमा खुल्ला प्रतिष्पर्धा नगराएपछि प्रदेश खेलकुदविरुद्ध आन्दोलनको तयारी

विराटनगर । कोशी प्रदेशको खेलकुद विकास बोर्डले करार प्रशिक्षकमा खुल्ला प्रतिस्पर्धा नगराई राजनीतिक फहुँचका व्यक्तिहरुलाई नियुत्त गर्ने तयारी गरेको बताइएको छ ।
बोर्डले गर्न लागेको नियुक्तिविरुद्ध खेल क्षेत्रका व्यत्तिहरूले आन्दोलनको चेतावनी दिएका छन् ।

बोर्डले आइतबार बिभिन्न खेलका प्रशिक्षकको सर्टलिष्टमा नाम सार्वजनिक गर्दा तीमध्ये केही खेलकुद नै छाडेका त केहीको खेलमा योगदान नै नभएकाहरू परेको खेल क्षेक्रका व्यत्तिहरूले बताएका छन् । 

खुल्ला प्रतिस्पर्धा गराउन माग गर्दै उसु खेलका चार जना स्वयमसेवक प्रशिक्षकले मंगलबार बोर्डमा ध्यानाकर्षण पत्र बुझाएका छन् । अन्यथा बिरोधका कार्यक्रम लिएर निस्कने उनीहरूको चेतावनी छ । स्वयंसेवकका रुपमा खेलाडीलाई उसुको प्रशिक्षण दिइरहेका धनकुटाका खेमराज थापा, इटहरीका दिपेन चाम्लिङ, पूर्वराष्ट्रिय खेलाडी भोजपुरका शर्मिला राई र विराटनगरका पिन्टु मोचीले पत्रमा हस्ताक्षर गरेका छन् ।

बोर्डका सदस्य सचिवलाई सम्बोधन गरेर ध्यानाकर्षण पत्र बुझाइएको छ । बोर्डले वैशाखदेखि असारसम्मका लागि करारमा बिभिन्न खेलका प्रशिक्षक नियुक्तिको प्रकृया सञ्चालन गरेको छ ।

धनकुटा घर भए पनि इलाममा गएर लामो अवधि स्वयंसेवक प्रशिक्षक बनेर काम गरेका थापाले बोर्डले जस्ता सुकै प्रशिक्षक नियुक्त गरे पनि खुल्ला प्रतिस्पर्धा नगरेको बताए ।

थापा कवर्डहल निर्माणका लागि धनकुटामा चार रोपनी जग्गादान गरेका व्यक्ति पनि हुन् । बुधबार आफूहरू ध्यानार्कषण पत्र लिएर बोर्डका कार्यालयमा जाँदा कोही पनि नभेटिएकाले कार्यालय सहयोगीलाई बुझाएर फर्किएको उनको भनाइ छ । त्यसपछि मुख्यमन्त्री कार्यालयमा जानकारी दिन जाँदा  त्यहाँ कोही पनि नभेटिएको थापाले बताए ।

उनीहरूले बुधबार नै प्रेस विज्ञप्ति जारी गरेर बोर्डले बनाएको सर्टलिष्ट सच्याएर योग्यता पुगेका र खेलमा योगदान गरेका आधारमा प्रतिस्पर्धी छनौट गर्न माग गरेका छन् ।

माग पूरा नभए बोर्ड बिरुद्ध चरणवद्ध आन्दोलनमा उत्रिने उनीहरूले चेतावनी दिएका छन् । भोलेन्टियर्स प्रशिक्षकहरूले रितपूर्वक निवेदन दर्ता गराएको विज्ञप्तिमा जनाइएको छ ।