झापामा दुर्गा प्रसाईँका समर्थकले जलाए तीनवटा भारतीय ट्रक

विराटनगर । आइतबार पक्राउ परेका मेडिकल व्यवसायी दुर्गा प्रसाईँका समर्थकले आइतबार राती र सोमबार बिहान गरी तीनवटा ट्रकमा आगजनी गरेका छन् । 

साइबर अपराधसम्बन्धि कसुरको आरोपमा प्रसाईँ पक्राउ परेपछि उनका समर्थकहरूले झापा बन्द समेत आह्वान गरेका छन् । बन्द अवज्ञा गरेको भन्दै सोमबार बिहानै उनीहरूले सुरुङ्गामा ट्रकमा आगजनी गरेको जनाइएको छ । 

ट्रकमा आगजनीपछि राजमार्गमा प्रहरी परिचालन गरिएको जिल्ला प्रहरी कार्यालय झापाले जनाएको छ ।

गएराति करिव ११ बजेतिर बिरिङ पुल नजिकै युपी ५७ एटी ४४९३ नम्बरको मालबाहक ट्रक प्रसाईँका समर्थकहरूले आगजनी गरेका थिए । मोटरसाइकलमा रहेको समुह आगजनीपछि फरार भएको जनाइएको छ । 

सोमबार बिहान प्रसाईँका समर्थकहरूले थप दुईवटा ट्रकमा आगजनी गरेको जनाइएको छ । 

बिर्तामोड नगरपालिका–६ गिरीबन्धु टि–स्टेट नजिकै डब्लु बी ७३ ई ३०५७ नम्बरको अर्को मालबाहक ट्रकमा पनि उक्त समुहले आगजनी गरेको प्रहरीले जनाएको हो ।

आगजनीका क्रममा ट्रकका चालक भारतकै सिलगुडीका कुमार महतोको हात जलेर घाइते भएको जनाइएको छ । प्रहरीले आगजनीमा संलग्नहरूको खोजी गरिरहेको जनाएको छ ।

प्रहरीले बन्दको प्रभाव नरहेको दाबी गरेको छ ।