इतिहास रच्दै फर्किइन् तेक्वान्दोकी सजिना

विराटनगर । अन्तर्राष्ट्रिय आईटीएफ तेक्वान्दो प्रतियोगितामा भाग लिन मलेसिया गएकी सजिना तामाङले दुई वटा पदक जितेकी छन् । मलेसियामा फागुन १७ देखि २० गतेसम्म भएको ‘हर्‍याङ वाररिअर आईटीएफ तेक्वान्दो वर्ल्ड च्याम्पियनसिप’ मा भोजपुरको षडानन्द नगरपालिका – ४ घर भएकी १६ वर्षीय सजिनाले स्वर्ण र रजत पदक जितेकी हुन् । 

उनले एकल स्पाइरिङ ४३ –५३ तौल समूहबाट स्वर्ण पदक र एकल प्याटन निलो पेटी समूहमा रजत पदक जित्न सफल भएकी छन् । तामाङ पछिल्लो समय आईटीएफमा उत्कृष्ट प्रदर्शन गर्दै आइरहेकी छन् । विगतमा पनि विभिन्न पदकहरू जितेकी छन् ।

तामाङले अन्तर्राष्ट्रिय स्तरमा पुगेर जितेको यो स्वर्ण पदक र रजत पदक  अहिलेसम्मको ठूलो उपलब्धि भएको नेपाल अर्न्तराष्ट्रिय तेक्वान्दो महासंघको केन्द्रीय अध्यक्ष प्रविणकुमार कार्कीले बताए । 

विश्वस्तरमा पुगेर तेक्वान्दो खेलाडी सजिनाले नेपालको नाम विश्वसामु उच्च राख्न सफल भएकी खेलाडीलाई संघीय सरकार र  प्रदेश सरकारले सम्मान गरिनुपर्ने अध्यक्ष कार्कीले बताए । 
स्वर्ण पदक जित्दै तामाङ बुधबार घर फर्किएकी छन् ।

उनलाई विराटनगर विमानस्थलमा कोशी प्रदेश आईटीएफ तेक्वान्दो संघले सम्मान गरेको छ । संघको कोषाध्यक्ष ओमकुमार श्रेष्ठले खेलाडी तामाङलाई सम्मान गरेको हो । नेपालबाट प्रतिनिधित्व गर्दै सजिनासहित चार जना तेक्वान्दोका खेलाडी र एक जना अम्पायरसहित पाँच जनाको टोली  फागुन १६  गते मलेसिया प्रस्थान गरेका थिए । 

चार जना खेलाडीमध्ये वीरेन्द्र कुँवरले दुई  विधामा दुई काँस्य पदक जित्न सफल भए । नेपालबाट तामाङ, कुँवरसहित खेलाडीहरू देवेन्द्र सुनार,  कैलाश अर्याल र नेपाल अन्तर्राष्ट्रिय तेक्वान्दो महासंघका कोषाध्यक्ष रहेका  विक्रम बाठा मगर अम्पायरको भूमिका निर्भाह गर्दै मलेसिया गएका थिए ।

सो प्रतियोगितामा विश्वभरीका ३१ भन्दा बढी राष्ट्रका २ हजार चार सय बढी तेक्वान्दोका खेलाडीहरुको सहभागिता थियो ।