बलात्कार आरोपमा चार पक्राउ

विराटनगर । मोरङको कटहरीमा मंगलबार हातखुट्टा बाँधिएको अवस्थामा अचेत भेटिएकी महिलाको बलात्कार भएको खुलेको छ । मंगलबार  मध्यान्हमा कटहरी गाउँपालिका–२ स्थित बाँसको झ्याङमा अचेत भेटिएकी महिलामाथि बलात्कार गरेको आरोपमा प्रहरीले चार जनालाई पक्राउ गरेको छ ।

जिल्ला प्रहरी कार्यालय मोरङका डीएसपी वेदप्रकाश जोशीका अनुसार पीडित महिलाले आफूमाथि जबरजस्ती करणी भएको बताएकी छन् । पक्राउ परेकाहरुबारे प्रहरीले व्यक्तिहरूको परिचय खुलाएको छैन ।

जहदा गाउँपालिकाकी ती महिला आइतबार बिहान आफ्नो घरबाट निस्किएकी थिइन् । उनी घरभन्दा दुई किलोमिटर टाढा रहेको एक बाँसको झ्याङमा अचेत भेटिएकी हुन् ।

ती महिला हातखुट्टा बाँधिएको, मुखमा पट्टी लगाइएको र कपडाहरू पनि च्यातिएको अवस्थामा फेला परेकी थिइन् ।  प्रहरीले महिलालाई उपचारका लागि कोशी अस्पतालमा पठाएको थियो । उनी होसमा आएपछि प्रहरीले ती महिलासँग घटनाबारे सोधपुछ गरी अनुसन्धानको प्रक्रिया अघि बढाएको डीएसपी जोशीले बताए । 

‘घटनास्थल हेर्दा पनि पीडितमाथि जबरजस्ती करणी भएको देखिन्थ्यो । पीडितसँग सोधपुछ गरी चार जनालाई पक्राउ गरेका छौं’, उनले भने, ‘उनीहरूसँग सोधपुछ र अनुसन्धान भइरहेको छ ।’