सरकार र मुक्कुमलुङ संरक्षक संस्थाबीच पहिलो दिनको वार्ता निष्कर्षविहीन

विराटनगर । सरकार र मुक्कुमलुङ संरक्षक संस्थाका बीच पहिलो दिन भएको वार्ता विना निष्कर्ष टुंगिएको छ । सोमबार अपरान्ह साढे ४ बजेदेखि राति साढे नौ बजेसम्म काठमाडौंको एउटा होटलमा चलेको वार्ता सहमतिमा नपुगेको आन्दोलनकारीका तर्फबाट गठित वार्ता टोली संयोजक अमर तुम्याहाङले जानकारी दिए ।

‘हामीले मुख्यतः दुई वटा माग अघि सार्यौं’, उनले भने ‘एउटा अल्पकालीन र अर्को दीर्घकालीन माग राख्यौं । सरकारी टोलीले अल्पकालीन माग नै पूरा गर्न नसक्ने भनेपछि वार्तामा कुनै सहमति भएन । मंगलबार बिहान ११ बजे फेरि वार्तामा बस्ने सहमति चाहिँ भएको छ ।’

तुम्याहाङले दिएको जानकारीअनुसार आन्दोलनकारीका तर्फबाट अल्पकालीन माग स्वरुप चार वटा माग अघि सारिएको थियो । 

‘केवलकार निर्माण स्थगन, पाथीभरा क्षेत्रबाट सुरक्षाकर्मी फिर्ता, पक्राउ परेका आन्दोलनकारी रिहा र घाइतेको उपचारसहित क्षतिपूर्तिको माग हामीले अल्पकालीन मागका रुपमा अघि सार्यौं’, वार्ता टोली संयोजक तुम्याहाङले भने ‘दीर्घकालीन मागमा भने यो योजना नै खारेज गरौं भन्ने थियो । तर, सरकारी टोली अहिले चलिरहेको निर्माण रोक्न नै तयार भएन । त्यसैले सहमति हुन सकेन ।’

तुम्याहाङको दाबीअनुसार गृह मन्त्रालयका सहसचिव प्रेमप्रसाद भट्टराई नेतृत्वको सरकारी वार्ता टोलीले भने निर्माण रोक्दा अहिलेको ताप्लेजुङ पुर्याइएको निर्माण सामग्री बिग्रने, फाउन्डेसनको काम नरोकौं, बरु माथिल्लो क्षेत्रमा अहिले काम नगरौंला भन्ने जवाफ दिएको थियो । 

‘पहिलो मागमै सरकारी टोली नकारात्मक भएपछि आजको वार्तामा सहमति जुट्न सकेन’, तुम्याहाङले भने ‘सरकारी टोलीले मान्छेको भन्दा बढी चिन्ता निर्माण सामग्रीको लिएको जस्तो देखियो । एकपटक भोलि राम्रोसँग सोचेर आउनुस् भनेका छौं ।’

सरकारले आइतबार गृह मन्त्रालयका सहसचिव प्रेमप्रसाद भट्टराईको नेतृत्वमा वार्ता समिति गठन गरेपछि आन्दोलनकारीका तर्फबाट ‘मुक्कुमलुङ संरक्षक संस्थाले पनि वार्ता समिति गठन गरेको जानकारी सोमबार सार्वजनिक गरेको थियो ।

आन्दोलनकारीका वार्ता संयोजक तुम्याहाङ उपत्यकामा बसेर प्राध्यापन गरिरहेका व्यक्ति हुन् । उनी माओवादीको ताप्लेजुङ जिल्ला कमिटी सदस्य हुन् । 

वार्ता टोलीका राम मादेन र  सरु सिङ्घक आदिवासी जनजाति अभियन्ता हुन् भने शंकर सुब्बा पनि उपत्यकामै बसेर वकालत गरिरहेका कानुन व्यवसायी हुन् ।

पाथीभरामा केवलकार निर्माणको विषयलाई लिएर विवाद भने जारी छ । 

ताप्लेजुङको प्रसिद्ध धार्मिकस्थल पाथीभरामा केबुलकार निर्माणको काम अघि बढेपछि त्यसको विरोधमा उत्रिएको ‘नो केबुलकार’ समूह र प्रहरीबीच अघिल्लो शनिबार भएको झडपमा प्रहरी र प्रदर्शनकारी घाइते भएका थिए ।