विराटनगरमा बालक बन्धक बनाएर फिरौती माग गर्नेहरु फरार

विराटनगर । विराटनगरमा एक बालकलाई बन्धक बनाएर फिरौती माग गरेको पाइएको छ । फिरौती माग गर्नेहरू फरार छन् । 

उनीहरूले बन्धक बनाउन बालबालिकाको प्रयोग गरेको पाइएको छ ।

स्रोतका अनुसार विराटनगर महानगरको उत्तरी क्षेत्रका एक बालकलाई मंगलबार बालबालिकाहरूले नै बन्धक बनाएका थिए । त्यसपछि युवाहरूले बालकका अभिभावकलाई फोन गरेर रकम लिएको बताइएको छ । 

केही रकम तत्काल लिएको र बाँकी पछि बुझाउने सर्तमा बालकलाई छाडिएको थियो ।

बालक बन्धक बनाउन प्रयोग भएका बालबालिकालाई भने प्रहरीले नियन्त्रणमा लिएर छाडेको छ ।

प्रहरी स्रोतका अनुसार नियन्त्रणमा लिइएका बालबालिकालाई बोलाएका बेला आउने सर्तमा अभिभावकको जिम्मा लगाइएको छ । 

घटना गराउने समूहको खोजीका लागि मोरङ प्रहरीले सादा पोशाकमा सुरक्षाकर्मी परिचालन गरेको छ । बन्धक बनाउनेमा दुई युवाको संलग्नता रहेको बताइएको छ । 

प्रयोग भएका बालबालिका र बन्धक बनाइएका बालकलाई नै ती युवाहरूबाट असुरक्षा हुने देखेर प्रहरीले गोप्य रूपमा अनुसन्धान गर्दैछ । फरार रहेका युवाहरू पेशेवर अपराधी रहे नरहेको पनि प्रहरीले अनुसन्धान गर्दैछ । 

मोरङ प्रहरीका प्रवक्ता  प्रहरी नायव उपरीक्षक कोपिला चुडालले सो घटनाबारे अनुसन्धान भैरहेको र अपराधी भाग्न सक्ने भएकाले यो विषय सार्वजनिक नगरिएको बताइन् ।