४० बोरा चिनी र ८ बोरा सुर्तीसहितको पिकअप प्रहरी नियन्त्रणमा

विराटनगर । अवैध रुपमा ल्याइएको ४० बोरा चिनी र ८ बोरा सुर्तीसहित उदयपुर प्रहरीले पिकअप गाडी नियन्त्रणमा लिएको छ । 

प्रहरी चौकी बेलस्रोतबाट खटिएको प्रहरी टोलीले बुधबार कटारी नगरपालिका–१ बेलस्रोतबाटै उक्त परिमाणको चिनी र सुर्ती बोकेको प्रदेश २–०१–००१ च ०६३० नम्बरको पिकअप गाडी नियन्त्रणमा लिएको हो ।

जिल्ला प्रहरी कार्यालय उदयपुरका अनुसार चिनी र सुर्ती सिरहा जिल्लाको भन्सार नाकाहरुबाट भन्सार छलेर अवैध रुपमा ल्याएको जनाइएको छ ।

प्रहरीले पिकअप गाडीलाई नियन्त्रणमा लिएर राजश्व अनुसन्धान कार्यालय इटहरी पठाएको जनाइएको छ ।