माओवादी कोशी प्रदेश कोषाध्यक्ष गगन पुरी सम्पत्ति शुद्धीकरण मुद्दामा दोषी ठहर

विराटनगर । नेकपा माओवादी केन्द्र कोशी प्रदेश कमिटीका कोषाध्यक्ष गगन भनिने रेवतराज पुरी सम्पत्ति शुद्धीकरण मुद्दामा विशेष अदालतबाट दोषी ठहर भएका छन् । विशेष अदालतले पुरी विरुद्धको सम्पत्ति शुद्धिकरण सम्बन्धि मुद्दामा आइतबार फैसला गर्दै कसुर ठहर गरेको हो ।

विशेष अदालतका न्यायधीसहरु टेकनारायण कुँवर, तेज नारायण सिंह राई र मुरारीबाबु श्रेष्ठको इजलासले पुरीलाई कसुर ठहर गरेको जनाइएको छ ।

पुरीविरुद्ध २०७७ माघमा अकुत सम्पत्ति आर्जन गरेको भन्दै १२ करोड १३ लाख ६२ हजार रुपैयाँ बिगोसहित विशेष अदालतमा सम्पत्ति शुद्धीकरण अनुसन्धान विभागले विशेष अदालतमा मुद्दा दायर गरेको थियो । विशेष अदालतमा सम्पत्ति शुद्धिकरण सम्बन्धि मुद्दा चलिरहेकै बेला उनी झापाको क्षेत्र नम्बर ५ को प्रदेश सभा (२) बाट उम्मेदवार बनेका थिए ।

पुरीले २० बिगाहा सरकारी जग्गा किर्ते गरी आफ्नो नाममा पारेर विभिन्न व्यक्तिहरूलाई बेचबिखन गरी सम्पत्ति बढाएको आरोप लागेको थियो । उक्त विषयमा सम्पत्ति शुद्धीकरण विभागले अनुसन्धान गरेर विशेष अदालतमा मुद्दा दायर गरेको थियो ।

विशेष अदालतमा पुरीसहित उनकी श्रीमती केशावती, दिदी मनमाया, नातेदार देवकुमार, कृष्णकुमार र संगीता पुरीविरुद्ध पनि मुद्दा दायर भएको थियो । विशेष अदालतले उनीहरूलाई समेत कसुरदार ठहर गरेको विशेष अदालत स्रोतले जनाएको छ ।

उनीहरु विरुद्धको मुद्दामा आइतबारको फैसलाले कसुर ठहर गर्दै सजाय निर्धारणका लागि पेस गरिने जनाइएको छ ।