रोकिएन गाँजा तस्करी, दुई सय किलो गाँजा बरामद

विराटनगर । कोशी प्रदेश प्रहरी कार्यालयको प्रादेशिक अनुसन्धान समूहबाट खटिएको प्रहरी टोलीले ठूलो परिमाणको गाँजा सहित एक जनालाई नियन्त्रणमा लिएको छ ।

विशेष सूचनाको आधारमा खटिएको प्रहरी टोलीले आइतबार बिहान पौने ५ बजे सुनसरीको इटहरी उपमहानगरपालिका–१ बाट बा १५ प ७१४  नम्बरको कारमा धरानबाट विराटनगर तर्फ ल्याउदै गरेको ८ वटा पोकामा रहेको २०० किलोग्राम गाँजा बरामद गरेको हो । 

गाँजा बोकेको कारका चालक धनकुटाको साँगुरीगढी गाउँपालिका–८ का ३४ वर्षीय दर्शन राईलाई  प्रहरीले नियन्त्रणमा लिएको छ । 

बरामद गाँजा सहित नियन्त्रणमा लिएको राईका सम्बन्धमा इलाका प्रहरी कार्यालय इटहरीबाट थप अनुसन्धान भइरहेको बताइएको छ । 

यसैगरी झापाको मेचिनगर नगरपालिका वडा नं. ६ स्थित पुरानो मेचीपुलबाट ब्राउन सुगर सहित १ जनालाई पक्राउ गरिएको छ । 

पक्राउ पर्नेमा झापाकै मेचीनगर नगरपालिका वडा नं.५ का १९ वर्षीय निर्दोश डाँगी रहेका छन् । इलाका प्रहरी कार्यालय कांकडभिट्टा र लागुऔषध नियन्त्रण ब्युरो कांकडभिट्टाबाट खटिएको प्रहरी टोलीले उनलाई ब्राउन सुगर ३ ग्राम ५२० मिलिग्राम सहित पक्राउ गरेको हो ।