अवैध असुलीका आरोपी अभिषेक गिरी पक्राउ पर्दा कारगारभित्र बिरोध प्रदर्शन

विराटनगर । कैदीबन्दीले पाउने गर्मी भत्ता असुली गरेको आरोपमा विराटनगरका अभिषेक गिरी पक्राउ परेपछि उनको समर्थन र बिरोधमा कारागार भित्र नाराबाजी भएको छ ।

विभिन अभियोगमा लामो समय जेल बसेर निस्केका गिरीलाई विराटनगर–८ स्थित उनको निवासबाट शनिबार विहान मोरङ प्रहरीले पक्राउ गरेको थियो । 

उनी पक्राउ परेपछि मोरङ कारागारमा दुई वटा ब्लकका कैदीबन्दीले समर्थन र बिरोधमा शनिबार बेलुकासम्म नाराबाजी गरेका हुन् । उनीहरूले कारागारभित्रै टायर बालेर बिरोध पनि गरेका  थिए ।

कारागारको बी ब्लकका कैदीबन्दीले गिरीको रिहाईको माग र ए ब्लकका कैदीबन्दीले कारवाहीको माग गर्दै चर्को नाराबाजी गरेका थिए ।

दुई ब्लकबीचमा तनाव बढ्न सक्ने देखेर ठूलो संख्यामा प्रहरी र सशस्त्र प्रहरी परिचालन गरिएको थियो । कारागार सुरक्षामा प्रमुख जिल्ला अधिकारी युवराज कट्टेलसहितका सुरक्षा अधिकारीहरू उपस्थित भएका थिए । 

कैदीबन्दीले पाएको जनही २ हजार ५ सय रूपैयाँ गर्मी भत्ता गिरीले लगेको प्रजिअ कट्टेललाई सूचना दिइएको थियो । सो कुरा बिभिन्न ब्यक्तिले शुक्रबार नै सामाजिक सञ्जालमा लेखेका थिए । 

कैदीबन्दीलाई सरकारले दिएर बितरण भएको भत्ता गिरीको घरमा कारागारका निमित्त चौकीदार चञ्चल बर्मनले लगिदिएको स्वीकार गरेपछि प्रहरी गिरीको घर पुगेको बताइएको छ ।

मोरङका प्रहरी नायव उपरीक्षक मकेन्द्रकुमार मिश्रले कैदीबन्दीलाई अनुचित प्रभावमा पारेर अबैध रूपमा रकम अशुली गरेको पाइएपछि गिरीलाई पक्राउ गरेर अनुसन्धान थालिएको जानकारी दिए । 

एक ब्लकमा रहेका कैदीबन्दीको करिव १३ लाख रूपैयाँ बर्मनले घरमा लगेर दिएको स्वीकार गरेपछि प्रहरीले गिरीको घरमा खानतलासी गरेको थियो । 

पक्राउ पछि गिरीलाई छाती दुखेकाले कोशी अस्पतालको आकस्मिक कक्षमा लगेर बिभिन्न परीक्षण गरिएको थियो । 

अस्पताल प्रमुख डा. चन्द्रभाल झाका अनुसार गिरीको रक्तचाप र मधुमेह बढेको देखिए पनि इसीजी भने सामान्य देखिएको थियो । गिरी अपहरण तथा शरीर बन्धक मुद्दामा ९ वर्ष जेल सजाय पाएर छुटेपछि नेपाली कांग्रेसको राजनीति र सामाजिक काममा सक्रिय छन् । 

नाराबाजीका क्रममा कैदीबन्दीले अप्रिय घटना गराउन सक्ने देखेर कारागारमा दमकल तैनाथ राखिएको छ । केही वर्षअघि गिरी सोही कारागारमा चौकीदारका रूपमा रहेका बेला जेल सरूवाको प्रयास गरिंदा यसरी नै कैदीबन्दीले आगजनी र तोडफोड गरेका थिए ।

चौकीदार रहेका बेला गिरीले कैदीबन्दीका लागि जेलभित्र सञ्चालन गरेका घरेलु उद्योग हालसम्म सञ्चालित छन् । त्यसबाट आउने मुनाफा हाल पनि गिरीलाई पठाउने गरिएको बताइएको छ ।