ससुराको हत्यामा संलग्न ज्वाइँ पक्राउ

विराटनगर । आफ्नै ससुराको धारिलो हतियार प्रहार गरी हत्या गरेको आरोपमा ज्वाइँ पक्राउ परेका छन् । मोरङको पथरीशनिश्चरे नगरपालिका–७ मायालु चोकका ६२ वर्षीय चन्द्र बहादुर तामाङको हत्यामा उनका ज्वाइँ २९ वर्षीय रविन राईलाई प्रहरीले पक्राउ गरेको हो ।

रविनले शनिबार बिहान ७ बजेर २० मिनेटको समयमा ससुरा चन्द्र बहादुरलाई दाउले घाँटी, टाउको र चिउँडोमा गम्भीर चोट लागेको थियो । चन्द्र बहादुरको घटनास्थलमै मृत्यु भएको थियो ।

ससुराको हत्यापछि फरार भएका रविनलाई खोज्ने क्रममा प्रहरीले आइतबार जिल्ला प्रहरी कार्यालय धनकुटाको समन्वयमा मुलघाटबाट पक्राउ गरेको जिल्ला प्रहरी कार्यालय मोरङका प्रवक्ता प्रहरी नायब उपरीक्षक ज्ञानेन्द्र बहादुर बस्नेतले जानकारी दिए ।

पक्राउ परेका उनलाई मोरङ जिल्ला अदालतबाट चार दिनको म्याद थप गरी इलाका प्रहरी कार्यालय पथरीले थप अनुसन्धान शुरु गरेको जनाइएको छ ।

प्रहरीले घटनाको प्रारम्भिक अनुसन्धानका क्रममा ज्वाइँ र ससुरा बिच मादक पदार्थ सेवन गरेर वादविवाद भएको जनाएको छ । वादविवाद पछि ज्वाइँ रविनले ससुरा चन्द्र बहादुरलाई दाउले प्रहार गरी हत्या गरेको प्रहरीले जनाएको छ ।