विराटनगर महिला उद्यमीहरुको कला प्रदर्शनी

विराटनगर । नेपालबाट गुणस्तरीय हस्तकलाका सामग्री विदेश निर्यातका लागि वार्षिक १२ खर्ब बराबरको माग भए पनि सीपयुक्त ललीतकलाकर्मीको अभावका कारण आपूर्ति हुन सकेको छैन ।

 नेपाल ललीतकला प्रतिष्ठानका सदस्य (प्राज्ञ) सञ्जय वान्तवा राईले भारत र चीन दुई शक्तिशाली  र सांस्कृतिक रुपमा सम्पन्न राष्ट्रका बीचमा रहेको नेपालबाट गुणस्तरीय हस्तकलाका सामग्री विदेश निर्यात गर्नका लागि १२ खर्ब विक्री गर्न सकिने अवस्था रहे पनि सीपयुक्त ललीतकलाकर्मीको अभाव खड्किएको बताए ।

महिला उद्यमी संघ, नेपाल मोरङ च्याप्टर (विन) को आयोजनामा बुधबार विराटनगरको स्टर्न स्टार होटलमा गरिएको चित्रकला तथा महिलाद्वारा उत्पादित उत्पादन तथा कला सामग्री फ्रदर्शनी एवम् विक्री कार्यत्रममा प्राज्ञ राईले ललीतकलाको विकासका लागि महिलाहरुको भूमिका महत्वपूर्ण रहेको बताए ।

कार्यक्रममा कोशी प्रदेशसभाकी सदस्य मीना श्रेष्ठले महिलाहरु आत्मनिर्भर र आर्थिक रुपमा सक्षम भएमा समाजमा लैङ्गीक विवेद स्वतः हटेर जाने बताइन् । महिलाहरुले आफ्नो क्षमता र सीपमा वृद्धिगरी आर्थिक रुपमा सक्षम हुनु पर्नेमा जोड दिइन् ।

स्वर संगम संगीतालय विराटनगरका अध्यक्ष कुशेश्वर राईले कलाले मानिसलाई पूर्ण बनाउने भएकोले महिलाहरुले छुट्टै कला प्रदर्शनी गर्नु सराहनीय भएको बताए ।

‘व्यवसायमा महिला’ शीर्षकमा गरिएको प्रदर्शनीमा महिलाद्वारा उत्पादित मह,मस्यौरा लगायतका उत्पादन, हस्तकलाका सामग्रीहरु, बाँस तथा खोसेलाका सामग्रीहरुका साथै स्थानीय अन्य सांस्कृतिक तथा हस्तकलाका सामग्रीहरु राखिएको थियो ।

उद्यमी र कलाकारको क्षमता अभिवृद्धि र प्रोत्साहन गर्नका लागि यो प्रदर्शनी कार्यक्रम गरिएका आयोजक विन मोरङकी अध्यक्ष कृति उपाध्याय श्रेष्ठले बताइन् । प्रदर्शनीमा ललीतकला संगमका चित्रकला पनि राखिएको थियो ।