धरानमा रात्रीकालीन फुटबलको पहिलो आयोजनामै उत्साह

धरान । धरान–१६ स्थित फुटबल रंगशाला दुई सातायता बत्तीले झलमल्ल छ । चहलपहल निकै बढेको छ । टेलिभिजनको पर्दामा रात्रीकालीन खेल हेर्दै आएका धरान तथा त्यस आसपासका स्थानीयले रंगशालामै पुगेर रातिको समयमा फुुटबल हेर्न पाएका छन् ।

धरानमा पहिलोपटक आयोजना गरिएको रात्रीकालीन फुटबल प्रतियोगितामा दर्शकको उपस्थिति पनि बाक्लो छ । दिउँसोको गर्मी सहदै आएका नगरवासी रात्रीकालीन फुटबलको मज्जा लिइरहेका छन् । 

स्थानीय केदार बस्नेतले भने, ‘अरुबेला दिउँसोको समयमा फुटबल खेल हुन्थ्यो, अहिले रातीको समयमा हुँदा सबै काम सकाएर थकान मेटाउने गतिलो माध्यम बनेको छ ।’ 

अर्की स्थानीय चन्द्रकला राई धरानमै पहिलोपटक आयोजना भएको रात्रीकालीन गोल्डकपले मनोरञ्जन दिइरहेको बताउँछिन् । 

उनले भनिन्, ‘अहिले गर्मी पनि बढेको छ, यस्तो बेला मैदानमै आएर शितल हावा खाँदै फुटबल हेर्नुको मज्जा नै बेग्लै छ ।’ 

लाहुरेको शहरका रूपमा परिचित धरान फुटबलका लागि पनि उर्वरभूमि मानिन्छ । धरानका चोक–चोकदेखि वडा–वडामा अहिले पनि फुटबल खेल हुन्छ । धरानमा आयोजना हुने यी साना ठूला सबै फुटबल प्रतियोगिता दिउँसो हुने गरेका छन् । 

यसपटक बत्तीको झिलिमिली उज्यालोमा आयोजना गरिएको गोधुली रनिङकप प्रतियोगितामा नगरवासीले रात्रीकालीन फुटबलको नौलो अनुभव लिन पाएको गोधुली क्लबका उपाध्यक्ष सतिस केसीले बताए । 

उनले भने, ‘रात्रिकालीन फुटबल प्रतियोगिताले दर्शकलाई मैदानसम्म ल्याएर खेलाडी, प्रशिक्षक र आयोजकलाई हौस्याएको त छ नै, साँझ परेपछि बन्द हुने धरान बजारलाई रातिको समयमा समेत चलायमान बनाएको छ ।’ 

धरानमै पहिलो पटक रंगशालामा अस्थायी बत्ती जडान गरेर प्रतियोगिता आयोजना गरिएको हो । 

धरानकै प्रतिष्ठित गोधुली क्लबले विगत २५ वर्षदेखि आयोजना गर्दै आएको गोधुली वडास्तरीय प्रतियोगितालाई यसपटक रजत उत्सवको रुपमा मनाउन रात्रीकालीन फुटबल गरेको केसीको भनाइ छ । 

२०५० सालदेखि वडा तहबाटै खेलाडीहरू उत्पादन गर्ने लक्ष्यका साथ सुरु गरेको यो प्रतियोगिताले धरानमा रात्रिकालीन फुटबल प्रतियोगिताको महौल निकै राम्रो देखाएको केसीले बताए । 

धरान रंगशालामा देखिएको यो माहौलले खेलाडी, प्रशिक्षक र आयोजक सबै उत्साहित भएको धरान ११ का टिम क्याप्टेन धिरेन लिम्बूले बताए । रात्रीकालिन प्रतियोगिताले खेलाडीहरूले नयाँ अनुभव गर्ने अवसर पनि पाएको लिम्बूको भनाइ छ ।

नेपाली फुटबलको इतिहास हेर्ने हो भने कुनै पनि प्रतियोगितालाई रजत उत्सवको रुपमा पुर्‍याउन निक्कै चुनौतीपूर्ण छ । 

यस्तो अवस्थामा गोधुली क्लबले फुटबल विकासका लागि गरेको यो निरन्तरता राम्रो भएको सुनसरी जिल्ला फुटबल संघका महासचिव कोबिदजंग कार्कीले बताउँछन् । 

आगामी दिनमा आयोजकले यसलाई निरन्तरता दिदै लैजानु भने चुनौतीपूर्ण रहेको कार्कीको भनाइ छ । चैत २१ गतेसम्म चल्ने प्रतियोगितामा धरान उपमहानगरका दुईवटा वडाबाहेक १८ वटा वडाले सहभागिता जनाएका छन् । 

प्रतियोगिताको विजेताले नगद १ लाख ५० हजार रुपैयाँ प्राप्त गर्नेछन् भने उपविजेताले ७५ हजार रुपैयाँ पाउने आयोजकले जानकारी दिएको छ ।