ग्रीनल्याण्डका विद्यार्थीले बनाए रिमोट कन्ट्रोल कार

विराटनगर । विराटनगर– ९ स्थित ग्रीनल्याण्ड कलेजका विद्यार्थीले रिमोटबाट चल्ने कार बनाएर सफल परीक्षण गरेका छन् । 

चारदिने वर्कसपको अन्तिम दिन विद्यार्थीहरुले कारको प्रदर्शनी गर्दै रिमोट कन्ट्रोलको माध्यमबाट सञ्चालन गरेका हुन् ।

आईएनजी (इनोभेट नेपाल ग्रुप) को सहकार्यमा कलेजले आयोजना गरेको चारदिने आईटी वर्कसपपछि विद्यार्थीले आफैं रिमोट कन्ट्रोल कार बनाएका हुन् ।

आईएनजीका इभेन्ट म्यानेजर प्रशान्त कुशवाहाले यति छोटो समयमा विद्यार्थीहरुले आफैं कार निर्माण गरेर सञ्चालन गर्नु प्रशंशनीय रहेको बताए । 

उनका अनुसार पहिलो दिन सैद्धान्तिक ज्ञान र दुई दिन व्यवहारिक ज्ञान सिकाइएको थियो । 

अन्तिम दिन भने विद्यार्थीहरुले आफै आरसी कार (रिमोट कन्ट्रोल कार) निर्माण गरेर सफल परीक्षण गरेका हुन् । 

वर्कसपमा  वर्कसपमा १५० जना विद्यार्थीले प्रत्यक्ष सहभागिता जनाएका थिए । प्रदर्शनीका लागि निर्माण गरिएका दुइवटा कारका लागि करिब १७ हजार रुपैयाँ खर्च भएको कलेजले जनाएको छ ।