तिब्बतमा भुकम्पको प्रभाव प्रसस्तै, ३२ जनाको मृत्यु, एक हजार बढि घर भत्किएको अनुमान

विराटनगर । नेपालसँगको सीमानामा पर्ने चीनको पहाडी तिब्बत क्षेत्रमा मंगलबार बिहान नेपाली समय अनुसार ६ बजेर ५० मिनेट आसपास गएको शक्तिशाली भूकम्पमा परी कम्तीमा ३२ जनाको मृत्यु भएको अन्तर्राष्ट्रिय संचार माध्यम बीबीसीले पुष्टि गरेको छ । भुकम्पमा परी ३८ जना बढी घाइते भएका छन् ।

तिब्बतको सिगात्से सहर आसपास केन्द्रविन्दु भनिएको शक्तिशाली भुकम्पले नेपालमा भने अहिलेसम्म कुनैपनि मानविय र भौतिक क्षति पुर्याएको विवरण आएको छैन । तर तिब्बतमा भने ठुलो क्षति देखिएको छ ।

अमेरिकी भूगर्भ सर्वेक्षणको विवरण अनुसार  भूकम्प ७.१ म्याग्निच्युड र १० किलोमिटर (६ माइल) गहिराईयुक्त थियो । 

यसको धक्का भने भारतको विहार राज्यसहित राजधानी दिल्लीसम्मै महसुस भएको भारतीय संचारमाध्यमले उल्लेख गरेका छन् । 

भुकम्प गएको क्षेत्र भूगर्भीय त्रुटि रेखामा रहेको जनाइएको छ । यो क्षेत्रमा भूकम्प जाने कुरा भने सामान्य भएको जनाइएको छ ।

चिनियाँ समाचार माध्यमहरुले भने भुकम्पपछि थप पराकम्पन पनि महसुस भएको र एक हजार बढी घरहरूमा क्षति पुर्याएको उल्लेख गरेका छन् ।

चिनियाँ वायुसेनाले सगरमाथाको फेदमा रहेका कम तापक्रम रहेका प्रभावित क्षेत्रमा उद्धार प्रयासका लागि ड्रोनहरू पठाएको जनाइएको छ । प्रभावित क्षेत्रमा विद्युत र खानेपानी अवरुद्ध भएको छ ।

भुकम्प गएको यो क्षेत्रलाई भारतीय र यूरेसियन टेक्टोनिक प्लेटहरू आपसमा ठोक्किइरहने प्रमुख फल्ट लाइनमा पर्ने भएकोले बारम्बार भूकम्पीय गतिविधि हुने जनाइएको छ ।