एमाले मोरङको १० औं जिल्ला अधिवेशन सुरु, ओली नआएपछि बादलले गरे उद्घाटन

विराटनगर । नेकपा एमाले मोरङको १० औं जिल्ला अधिवेशन शनिबार विराटनगरमा सुरु भएको छ । अधिवेशनको उद्घाटनका लागि पार्टी अध्यक्ष एवं प्रधानमन्त्री केपी शर्मा ओली आउने प्रचार गरिएपनि अन्तिम समयमा उनी आएनन् ।

अधिवेशनको उद्घाटन पार्टी उपाध्यक्ष राम बहादुर थापा (बादल) ले रिमोटबाट डिजिटल ब्यानर अनावरण गरेर गरेका छन् । 

एमाले मोरङ संगठन कमिटीका अध्यक्ष बाबुराम कार्कीले शुक्रबार साँझसम्म पनि अधिवेशनको उद्घाटन गर्न पार्टी अध्यक्ष ओली आउने दाबी गरेका थिए । तर उद्घाटन समारोहमा अध्यक्ष कार्कीले ओली नआएका कारण उपाध्यक्ष राम बहादुर थापाले गर्नुपरेको प्रष्टिकरण दिए ।

पार्टीको नवौं जिल्ल अधिवेशन सर्वसम्मत रुपमा सम्पन्न गरेको विराटनगरको बरगाछीस्थित होटल मनास्लु इनमै १० औं जिल्ला अधिवेशन सुरु भएको हो । 

यो अधिवेशनमा जिल्लाका १७ वटा पालिका, जनसंगठन, विशेष क्षेत्र, दलित र पाँच प्रतिशत मनोनितसहित ९१९ जना प्रतिनिधि सहभागी रहेको अध्यक्ष कार्कीले बताए ।

उनले एमालेले एउटै सुत्रमा बाँधेर अघि बढाउन सक्ने र जनताको बहुदलीय जनवादबाट आलोकित भएको नयाँ नेतृत्व निर्माण हुने विश्वास दिलाए ।