वडाध्यक्षले किनिदिए विद्यार्थीलाई पोशाक

धनकुटा, १९ पुस । महालक्ष्मी नगरपालिका–२ का वडाध्यक्ष पदम रखाल मगरले आफूले पाउने पैसाबाट विद्यार्थीलाई पोशाक किनिदिएका छन् । सेवा सुविधा बापत आफूले पाउने तीन महिनाको पैसाबाट वडाध्यक्ष मगरले महालक्ष्मी–२ सान्नेटारस्थित ऐश्वर्य आधारभूत विद्यालयका विद्यार्थीलाई पोशाक किनिदिएका हुन् ।

बुधबार कार्यक्रम गरेर वडाध्यक्ष मगरले विद्यार्थीहरुलाई पोशाक वितरण गरेका छन् । उनले सो विद्यालयमा अध्ययनरत ३८ विद्यार्थीलाई ट्रयाकसुट र टिसर्ट वितरण गरेका हुन् । वडाध्यक्षका हिसावले राज्यले दिएको सेवा सुविधाबाट सामाजिक काम गरौं भन्ने उद्देश्यले विद्यार्थीलाई प्रोत्साहनका लागि पोशाक वितरण गरेको वडाध्यक्ष मगरले जानकारी दिए ।

जाडोयाममा विद्यार्थीलाई न्यानो बनाउन कपडा प्रदान गरेको उनी बताउँछन् । विद्यार्थी संगठनको राजनीति गर्दै आएका मगर गत स्थानीय तह निर्वाचनमा नेकपा माओवादी केन्द्रको तर्फबाट वडाध्यक्षमा निर्वाचित भएका हुन् ।