प्राकृतिक प्रकोपमा सशस्त्रको साहस

सप्तरी । तीन वटा घरमा एकै पटक लागेको आगो नियन्त्रण सहज थिएन । कोही घरभित्र थुनिएका थिए भने कोही बाहिरबाट चिच्याउँदै थिए । कोही त आङ्खना परिवारका सदस्य र धनमाल निकाल्न दनदनी बलेको आगोतर्फ दौडदै थिए ।

सशस्त्र प्रहरीले केही बेरमै तीन वटा घरको आगो निभाएर मानिसको उद्धार गर्यो । जलेको घरभित्र थुनिएका मानिसको उद्धारमा खटिएका सुरक्षाकर्मीको शरीरमा आगो दन्कियो । सबै मानिसको उद्धारमा लागेकाले उनलाई सहयोग गर्ने अरु भएनन् । 

शरीरको आगो भुईँमा लडिबुडी गरेर आफै निभाए । यो सबै बिपद् व्यवस्थापनमा सशस्त्र प्रहरीले अब्बल भएको देखाउन गरेको प्रदर्शनी थियो । 

सशस्त्र प्रहरीको सप्तरी बरमझियास्थित दन्तकाली विशेष कार्य तालिम शिक्षालयले आइतबार गरेको क्षमताको प्रदर्शनीमा यसरी प्रकोपको उद्धार गर्न सक्षम रहेको देखाइयो । 

प्रर्दशनीका लागि बनाइएका तीन वटा फुसका सांकेतिक घरमा आगो लगाएर दमकल तथा सशस्त्रका तालिमप्राप्त सुरक्षाकर्मीले निभाएर घरभित्र थुनिएका मानिसको उद्धार गर्न सकिने क्षमता प्रस्तुत गरे ।

शिक्षालयका प्रमुख एवं सशस्त्र प्रहरी वरिष्ठ उपरीक्षक नेत्रबहादुर कार्कीका अनुसार जवानदेखि नायव उपरीक्षकसम्म ४८ जनाले बिपद्मा आइपर्ने समस्यामा परेका मानिसको उद्धार सम्बन्धीको तालिम पाएका छन् ।

तालिम समापनमा प्रशिक्षार्थीले आफूले सिकेको क्षमता प्रस्तुत गर्ने क्रममा भूकम्पले क्षति भएको घरभित्र थुनिएका मानिसको उद्धार गर्न घरको पर्खाल काटेर भित्र प्रवेश गरेको देखाइएको थियो ।

भूकम्पको जोखिममा परेर थुनिएका व्यक्तिलाई डोरीको माध्यमबाट स्टे«चरमा झुण्डाएर गरिएको उद्धार वास्तविक जस्तै थियो । 

तालिममा सैद्धान्तिक र ब्यवहारिक दुबैतर्फ प्रथम हुने प्रशिक्षार्थी सशस्त्र प्रहरी नायव उपरीक्षक शितल क्षेत्री प्रथम भएका छन् । उनलाई सशस्त्र प्रहरी नायव महानिरीक्षक कालिदास धौबजीले पुरस्कार प्रदान गर्दै देशभरमा हुने गरेका प्राकृतिक प्रकोपमा सशस्त्र प्रहरीको योगदान रहेको स्मरण गराए ।

कार्यक्रममा कञ्चनरुप नगरपालिकाका मेयर ललनप्रसाद गुप्ताले यस क्षेत्रमा आइपर्ने प्रकोपबाट स्थानीयलाई जोगाउन सशस्त्र प्रहरीलाई उपकरणमा सहयोग गर्न नगरपालिकाले योजना बनाएको बताए । 

उनले नेपालमा आएका बिनाशकारी भूकम्प, बाढी र आगलागीमा सशस्त्र प्रहरीले गरेको योगदानको चर्चा गर्दै कोशी नदीको पश्चिमी भागका जनताको सुरक्षाका लागि सशस्त्र प्रहरीलाई स्थानीय सरकारहरूले सहयोग गर्ने बताए ।

सशस्त्र प्रहरीको साहसपूर्ण उद्धारको प्रर्दशनी अवलोकन गरेपछि हनुमाननगरका मेयर वीरेन्द्र माझीले बाढी पहिरोको जोखिम भएको देशका हरेक क्षेत्रमा सशस्त्र प्रहरीलाई उपकरणयुक्त बनाएर परिचालन गरिनुपर्ने बताए । 

कार्यक्रममा बाढी, पहिरोबाट उद्धार गर्ने सामग्रीहरू पनि प्रदर्शनी गरिएको थियो । 

तालिमका लागि एक लाख ५० हजार रुपैयाँको बजेटमा १० लाख ५० हजार रुपैयाँको टावर निर्माण गरिएको सशस्त्र प्रहरी नायव उपरीक्षक तथा तालिमका प्रशिक्षक फडिन्द्र शाहीले बताए ।