उद्योगहरूमा विद्युत आपूर्तिमा उल्लेख्य सुधार

विराटनगर । दैनिक लामो अघोषित लोडसेडिङको मार खेपिरहेका सुनसरी मोरङ औद्योगिक करिडोरका उद्योगहरूमा केही दिनयता विद्युत सेवामा उल्लेख्य सुधार भएको छ । 

उद्योगीहरूका अनुसार शनिबारयता उद्योगहरूमा विद्युत आपूर्ति नियमित भइरहेको छ । यसले उद्योगहरूको उत्पादन पनि बढाएको छ । 

‘चैत १६ गते शनिबारयता उद्योगहरूमा विद्युत आपूर्तिमा उल्लेख्य सुधार भएको छ’, विराटनगरका उद्योगी नविन रिजालले भने ‘शुक्रबारसम्म दैनिक कम्तीमा ६ घन्टादेखि १२ घन्टासम्म अघोषित लोडसेडिङ थियो ।

अहिले त्यो लगभग पूरै हटेको छ । घरीघरी आपूर्ति रोकिने समस्याबाहेक विद्युत सेवा नियमित छ ।’

उद्योग संगठन मोरङले दिएको जानकारी अनुसार शनिबारयता उद्योगहरूमा विद्युतको समस्या छैन । ‘अहिले ट्रिपिङ हुँदाको अवस्थामा मात्रै विद्युत घरीघरी नआउने समस्या छ, अन्यथा विद्युत सेवा नियमित रहेको उद्योगहरूले बताइरहेका छन्’, संगठनका महानिर्देशक चुडामणि भट्टराईले भने ‘१६ गतेयता विद्युत अनियमित भएको गुनासो छैन ।’

नेपाल विद्युत प्राधिकरणले भारतले रातिको समयमा विद्युत नदिएको कारण देखाएर उद्योगहरूमा रातिको समयमा विद्युत आपूर्ति कटौती गरेको थियो । प्राधिकरणले विद्युत कटौती गरे पनि घोषित रुपमा लोडसेडिङ भने थिएन । 

यद्यपि रातको समयमा सुनसरी मोरङ औद्योगिक करिडोरका उद्योगहरू विद्युत अभावले ठप्पप्रायः थिए । पछिल्लो समय भारतले थप बिजुली दिएपछि यो समस्या कम भएको हो । 

‘सुख्खायाममा हाम्रो आफ्नो उत्पादनले यहाँको माग धान्नै सक्दैन, त्यसैले भारतीय बिजुलीमा निर्भर हुनुपर्छ’, उद्योगी रिजालले भने ‘अहिले भारतले थप बिजुली दिएपछि समस्या घटेको छ । तर, यस्तै अवस्थाको सुनिश्चितता होस् भन्ने हाम्रो माग हो ।’

विराटनगरमा मात्रै नभइ बिजुली आपूर्तिमा सुधार भएपछि देशव्यापी रुपमा यसको सकारात्मक प्रभाव परेको छ । 

नियाृत उद्योगीहरूको संस्था फेडेरेसन अफ नेपाल एक्स्पोर्ट एसोसिएसनले विज्ञप्ति निकालेर प्राधिकरणले औद्योगिक क्षेत्रमा नियमित विद्युत आपूर्ति गर्न थालेको भन्दै खुशी प्रकट गरेको छ । संस्थाले यस्तै अवस्थालाई निरन्तरता दिन माग पनि गरेको छ ।

पछिल्लो समय भारतले दिउँसो मात्रै विद्युत दिने र रातको समयमा नेपालतिर बिजुली दिन बन्द गरेको थियो । 

भारतको यस्तो निर्णयपछि पूर्वको औद्योगिक ग्रिडमा १२ घण्टासम्म अघोषित लोडसेडिङ भइरहेको थियो । यही कारणले बहुसंख्यक उद्योगले ७० प्रतिशतसम्म उत्पादन कटौती गर्नुपरेको थियो ।

सुनसरी मोरङ औद्योगिक करिडोरमा अघोषित लोडसेडिङले पारेको असरबारे उद्योग संगठन मोरङले यही वर्ष अध्ययनसमेत गरेको थियो । 

अध्ययन प्रतिवेदन अनुसार आर्थिक वर्ष २०८१–८२ को पुसदेखि चैतसम्मको अवधिमा वर्षभरीमा ३१२ घन्टाभन्दा बढी समय विराटनगरका उद्योगहरूले अघोषित लोडसेडिङको मार सहनु परेको छ । 

आर्थिक वर्ष २०८०–८१ मा त वर्षभरीमा ८८७ घन्टाभन्दा बढी समय अघोषित लोडसेडिङ यहाँका उद्योगहरूले व्यहोरेका थिए । 

‘अहिले जस्तै नियमित विद्युत आपूर्तिको दीर्घकालीन प्रबन्ध सरकारसँग हाम्रो मुख्य माग हो’, उद्योगीहरूको भनाइ छ । 

सुनसरी मोरङ औद्योगिक करिडोरका साना, मझौला र ठूला गरी ५ सयभन्दा बढी उद्योगधन्दा छन् । 

ती उद्योगहरूलाई दैनिक रूपमा कम्तीमा १८० मेगावाट विद्युत आवश्यक पर्दछ ।