यात्रुमाथि यति एयरको असंवेदनशील व्यवहार

विराटनगर । जहाजबाट उत्रिने बेलामा सिटको हत्ता (हात राख्ने ठाउँ) मा ठोक्किएको निहुँमा विराटनगरका एक यात्रुले विमान कम्पनीबाट अनावश्यक मानसिक यातना खेप्नुपरेको घटना बाहिरिएको छ । 

निजी क्षेत्रको चर्चित विमान कम्पनी यतिले आफ्ना यात्रुको सामान्य गल्तीलाई ठूलो अपराध जसरी पेश गर्दा विराटनगरका एक पाका दम्पत्तिले पछिल्लो दुई साता ठूलो तनावको सामना गर्नुपरेको छ । यो घटना माघ १६ गतेको हो । 

विराटनगर–८ अमरटोलका बासिन्दा ६२ वर्षीय पण्डित वासुदेव काफ्ले र उनकी पत्नी मिनाकुमारी दाहालले यो तनावबाट सोमबार मात्रै मुक्ति पाएका छन् । त्यो पनि प्रहरी कार्यालयमा पुगेर माफीनामामा कागज गरेपछि मात्रै उनीहरू एयरलाइन्सले दिएको झन्झटबाट मुक्त भएका हुन् । 

पुराणहरूमा कथावाचन गर्दै आएका काफ्ले र उनकी पत्नी त्यस दिन काठमाडौंबाट विराटनगर फर्कने तय थियो । बिहान ९ः३५ को यतिको टिकट भएका कारण उनीहरू दुवै जना एक घण्टाअघि नै काठमाडौंस्थित त्रिभुवन अन्तर्राष्ट्रिय विमानस्थलको आन्तरिक टर्मिनलमा पुगेका थिए । तर, मौसमी प्रतिकूलताको कारण देखाउँदै यतिले जहाज भनेको समयमा उडाएन । 

‘छिटै घर आइपुगिन्छ भन्ने सोचेर विमानस्थल पुगेका हामीलाई दिउँसो २ः५५ मा मात्रै विराटनगरका लागि उडायो’ पण्डित काफ्लेले त्यो दिनको तनाव सम्झिए ‘हामी वैश्णव धर्मावलम्बी भएकाले बाहिरका खानेकुरा खाँदैनौं । दिनभरी विमानस्थलमा भोकै जस्तो भएर बसियो ।’ 

नेपाली हवाई यात्रुले बारम्बार भोगिरहने यो साझा तनाव व्योहोर्दै उनीहरू दिउँसो ३ः२७ मा विराटनगर विमानस्थल ओर्लिए । 

३ बजेर ३४ मिनेटमा जहाजबाट बाहिर निस्कने क्रममा काफ्ले फोनमा गफिदै भर्खरै अवतरण भएको खबर कसैलाई सुनाउँदै थिए, त्यहीबेला उनी हुत्तिए । 

जहाजबाट बाहिर निस्कने क्रममा हुत्तिदा उनी विमानको एउटा सिटको हत्तामा गएर नराम्रोसँग ठोक्किए । ‘एकातिर चिसो, अर्कोतिर सिटको हात राख्ने ठाउँमा दह्रोसँग ठोक्किदा ज्यादै दुख्यो, आफैले आफैलाई सुम्सुम्याउँदै म बाहिर निस्कें’, उनले भने ‘बाहिर निस्केपछि विमानका कर्मचारीले मलाई सिटको हात राख्ने ठाउँ भाँचेको भन्दै रोके ।’ 

त्यहाँ उनले आफू हुत्तिएर गएर ठोक्किएको बताइरहे तर यति एयरलाइन्सका कर्मचारीले सुनेनन् । उल्टै विमानस्थलमा खटिएका प्रहरी बोलाएर उनलाई घेरा हाल्न लगाइयो । 

‘तपाई  ठोक्किएको  सिटको हात राख्ने ठाउँमा क्षति भयो, अब ‘तपाईले मर्मत गर्नुपर्छ’ भन्दै मलाई त्यसपछि दुई घन्टाभन्दा बढी समय यति एयरका कर्मचारीले एयरपोर्टमै रोकेर राखे’, उनले भने ‘त्यसपछि विमानस्थलकै प्रहरी युनिटमा एउटा फारम भरेर मेरो छोराले मलाई र श्रीमतीलाई उकासेर घर लिएर गयो ।’ विमानस्थल प्रहरीमा गरिएको कागजमा भोलिपल्ट भेटेर कुरा मिलाउने सहमति भएको थियो । 

भोलिपल्ट अर्थात माघ १७ मा उनीहरूका छोरा भरत काफ्ले पूर्व सहमतिअनुसार विमानस्थल पुगे । उनले  यति एयरलाइन्सका कर्मचारीहरूलाई आफू अघिल्लो दिनको घटनाबारे विमानस्थलकै प्रहरी युनिटमा भएको सहमतिअनुसार आएको सुनाए । कर्मचारीहरूले घटनाबारे यति एयरको केन्द्रमा रिपोर्ट गरेको र काठमाडौंबाट खबर आएपछि बोलाउने जवाफ दिए । भरत विमानस्थलबाट त्यत्तिकै घर फर्किए । 

पण्डित दम्पत्तिको तनाव त्यहीँ टुंगिएन । यति एयरलाइन्सले काफ्ले दम्पत्तिबाट ५० हजार क्षतिपूर्ति भराउनुपर्ने भन्दै जिल्ला प्रहरी मोरङमा उजुरी नै दिएको खबर पाएपछि उनीहरू झनै छक्क परे । त्यसबीचमा उनीहरूलाई यतिका कर्मचारी भागवत यादवले झनै डर देखाइदिए । 

‘यादवले अब अन्तर्राष्ट्रिय हवाई कानूनअनुसार तपाईहरूलाई दुई वर्ष कैद र दुई लाख रुपैयाँ जरिवाना हुन्छ भनेर धम्क्याउनुभयो’, काफ्लेले भने ‘केही थाहा थिएन । त्यसैले डर लाग्ने नै भयो । पुराणमा कथा वाचन गर्दै हिंड्ने साधुसन्त जस्तो मान्छे, नराम्रो आरोपमा फसियो जस्तो लागिरह्यो ।’

यही क्रममा सोमबार बिहान साढे नौ बजेतिर पण्डित काफ्लेलाई जिल्ला प्रहरी कार्यालय मोरङले छलफलका लागि भन्दै बोलायो । दिउँसो डेढ बजे उनी प्रहरी कार्यालयमा पुगे । प्रहरीकोमा यति एयरका कर्मचारीहरू पनि उपस्थित थिए । 

प्रहरीमा भएको छलफलमा पनि यति एयरका कर्मचारीहरू मनिषा श्रेष्ठ र भागवत यादव नै उपस्थित थिए । उनीहरू दुवै जनाले ५० हजार नतिरेसम्म यति एयरले नमान्ने अडान लिइरहे । उनीहरूबीचको छलफलको सहजीकरण गरिरहेका प्रहरी निरीक्षक हेमराज ओलीले त्यहीँबाट यतिको काठमाडौं कार्यालयमा सम्पर्क गरे । 

‘घटना नियतवश भएको देखिन्न’ भन्ने प्रहरी निष्कर्ष सुनेपछि यति एयरको काठमाडौंस्थित कर्मचारीले सहमतिमा हस्ताक्षर गर्न विराटनगरका कर्मचारीलाई अनुमति दिए । त्यसपछि ‘मैले अञ्जानमा हुत्तिएर गल्ती गरेँ, आइन्दा यस्तो हुने छैन’ भन्ने ब्यहोराको कागजमा सही गराएपछि पण्डित र उनकी पत्नीले यो तनावबाट छुटकारा पाए । 

यति एयर र उनीहरूबीच सहमति भएको दिन सोमबार साँझ उद्घोषले पण्डित काफ्लेलाई फोन गरेर घटनाबारे सोधेको थियो । सहमतिपछि पनि उनी त्रस्त सुनिन्थे । ‘मलाइ नराम्रो आरोप लाग्यो, फेरि उल्ट्याएर दुःख दिने हुन् कि’ भन्दै उनी चिन्ता जाहेर गर्दै थिए । 

घटनाबारे प्रहरी निरीक्षक ओलीलाई पनि उद्घोषले सोधेको छ । ६२ वर्षका पण्डितले जहाजको सिटमा क्षति पुर्याएकै हुन् त ?  प्रहरी निरीक्षक ओलीको जवाफ थियो ‘त्यस्तो होइन । यतिले क्षतिपूर्ति दाबी गरेको थियो । हामीले दुवै पक्षलाई छलफल गराएर मिलापत्र गराएका छौं । घटना नियतवश गरेको देखिएन ।’

प्रहरीले मात्रै होइन, आफ्ना यात्रुलाई १५ दिन जति मानसिक यातना दिइसकेको यति एयरलाइन्स आफै पनि काफ्लेको कुनै नियत वा दोष नभएको निष्कर्षमा पुगेको छ । त्यैपनि यो घटनाबाट विमानले अरु यात्रुहरूलाई ‘म्यासेज भने दिएको’ भन्दै यति एयरले ‘यो घटनामा अरुलाई शिक्षा दिन सकेको’ जस्तो प्रतिक्रिया दिएको छ । 

‘अञ्जानमा ठोक्किएर त्यस्तो भएको रहेछ, विचरा बूढा मान्छे रहेछन्’, यति एयरका विराटनगर स्टेशन प्रमुख प्रेम कुँवरले भने ‘अरुलाई सबक सिकाउन पनि, सन्देश दिन पनि यति त गर्नैपर्थ्यो । यति भए अरुलाई पनि म्यासेज भयो नि ! तर, उनले जानेर गरेका होइनन् । यो ठूलो केस होइन, यसलाई ठूलो नबनाऊँ न अब ।’