विराटनगरको कञ्चन छापाखाना र स्टेशनरीमा आगलागी

विराटनगर । विराटनगर–११ बसपार्कस्थित कञ्चन बहुउद्देश्यीय कम्पनी प्रालिद्वारा सञ्चालित कञ्चन छापाखाना तथा कञ्चन स्टेशनरीमा बिहीबार साँझ आगलागी भएको छ ।

सञ्चालक सन्तोष पौडेलका अनुसार, विद्युत सर्ट भई अचानक सुरु भएको सो आगलागीले छापाखानाका सम्पूर्ण महत्त्वपूर्ण कागजातहरू तथा महँगा मिल मेशिनरीहरू जलेका  छन् ।

साँझ ६ बजेबाट सुरु भएको आगोको ज्वालाले ठूलो रूप लिँदा नियन्त्रणमा लिन निकै ठुलो क्षति बेहोर्नुपरेको थियो । स्थानीय बासिन्दा, सुरक्षाकर्मी र दमकलको प्रयासपछि राति अबेर मात्र आगोलाई पूर्ण रूपमा नियन्त्रणमा लिन सकिएको थियो ।

आगलागीबाट भएको कुल आर्थिक क्षतिको यकिन विवरण हालसम्म आइसकेको छैन र यसको संकलन कार्य भइरहेको सञ्चालकले बताएका छन् ।