ह्याक हुँदै बैंक खाता र इसेवा

विराटनगर । बैंक खाता र इसेवा प्रयोगकर्तालाई पुरस्कार परेको भन्दै झुक्याएर पैसा निकाल्ने ह्याकर गिरोह पुनः सक्रिय भएका छन् । पुरस्कारको लोभमा धेरै मानिस अपरिचित गिरोहबाट ठगिने गरेका छन् । 

नेपाल टेलिकम विराटनगरमा कार्यरत एक कर्मचारीको बैंक खाताबाट ह्याकरले सोमबार बेलुका एक लाख रुपैयाँ अन्यत्र पठाएको छ । 

ह्याकरले सोही समयमा एक सञ्चारकर्मीको इसेवा ह्याक गरेर सो एक लाख रुपैयाँ इसेवा मार्फत तीन ठाउँमा पठाएको हो । कर्मचारी र सञ्चारकर्मी दुबैलाई फोन गर्ने व्यक्तिले ५५ सय रुपैयाँ इसेवाले बोनस पठाएको जनाएर रकम रिसिभ गर्न लगाएको थियो ।

बेलुका ६ बजेर १ मिनेटमा र ६ बजेर २ मिनेटमा ती कर्मचारीको नबिल बैंकको खाताबाट ५०–५० हजार रुपैयाँ सञ्चारकर्मीको इसेवाको खातामा आएको थियो । 

ह्याकरले सो रकमबाट राउल श्रेष्ठको कुमारी बैंक खातामा बेलुका ८ बजेर १९ मिनेटमा ५० हजार रुपैयाँ पठाएका थिए । त्यसपछि २५ हजार रुपैयाँ मनीषकुमार पण्डितलाई र २४ हजार ९ सय रुपैयाँ बेरालाल पटेललाई लगातार पठाएका थिए ।

ह्याकरले ह्वाट्सएपमा भिडियो मार्फत इसेवा र बैंक खातामा बोनसको ५५ सय रुपैयाँ आएको जनाउ दिएर पिन नम्बर हाल्न लगाएका थिए । 

टेलिकमका कर्मचारीको खाताको रकम एक मिनेटमा ५० हजारका दरले दुई पटक निकालिएको म्यासेज आएपछि बाँकी रकम अर्को खातामा ट्रान्सफर गरेर जोगाएका छन् । इसेवाले रकम आएको र गएको म्यासेज दिने नगरेकाले सञ्चारकर्मीले भने प्रहरीले बताएपछि मात्रै थाहा पाएका छन् ।

ती सञ्चारकर्मीले भने बेलुका नै आफूलाई ९८१८००८२८६ नम्बरबाट फोन आएर तीन पटक एसएमएस पठाउन लगाएको प्रदेश प्रहरी प्रमुख डीआईजी राजन अधिकारी र मोरङका प्रहरी उपरीक्षक नारायण चिमरियालाई जानकारी दिंदै अनलाइन इसेवा र मोबाइल बैंकिङ खाता खोल्न लगाएको जनाएका थिए । डीआईजी अधिकारी र एसपी चिमरिया दुबैले त्यो नम्बर गलत भएको म्यासेज पठाएका थिए ।

अधिकारीले भने साइबर ब्युरोलाई समेत जानकारी दिन लगाएका छन् । यसरी गोप्य ठाउँमा बसेर अपरिचित मानिसले बोनस रकम पाएको भनेर विभिन्न ब्यक्तिलाई फोनमार्फत झुक्याउने गरेको पाइएको छ । 

जिल्ला प्रहरी कार्यालय मोरङमा साइबर अपराधको अनुसन्धान गर्दै आएका प्रहरी निरीक्षक सरोज खनालका अनुसार चालु आर्थिक वर्षको ६ महिनामा यसरी जिल्लामा दुई सय जति मानिस पीडित भइसकेका छन् ।

उनका अनुसार यतिका मानिसको करिव सात करोड रुपैयाँ ह्याकरले लगिसकेको पाइएको छ । इन्टरनेटको गलत प्रयोग गरेर ह्याकरहरूले सामान्य रकम पुरस्कार परेको विश्वास दिलाएर खातामा भएको रकम अरुको खातामा पठाउने गरेका छन् । यस्ता उजुरी देशभरबाट नेपाल प्रहरीलाई जाने गरेको छ ।