इस्ट होराइजन मावि मलेसियामा सम्मानित

धुलाबारी । पढाइसँगै अतिरिक्त क्रियाकलापमा अब्बल रहेको झापाको मेचीनगर नगरपालिका-१० धुलाबारीस्थित इस्ट होराइजन मावि मलेसियामा सम्मानित भएको छ ।

“बेस्ट अल राउण्डर विद्यालय” विधातर्फ होराइजन मावि मलेसियामा आयोजित वर्ल्ड स्कुल समिटमा सम्मानित भएको विद्यालयका प्रिन्सिपल सञ्जीव राईले बताए ।

१६ देखि १८ जनवरीसम्म हेल्प युनिभर्सिटी मलेसियामा आयोजित विश्वका १०० भन्दा बढी विद्यालयका प्रतिनिधिमाझ इस्ट होराइजन माविलाई सम्मानित गरिएको हो । 

विद्यालयले पढाइसँगै अतिरिक्त क्रियाकलापमा आफ्ना बिध्यार्थिलाई अब्बल बनाउन, अहिलेको शैक्षिक आवश्यकता परिपूर्ति गर्न विद्यालयले गरेको रचनात्मक र कलात्मक उत्कृष्टता बाहिर ल्याएकोमा गर्व लागेको विद्यालयका प्रमुख प्रशासक सावित्री सापकोटा राईले बताइन् ।

वर्तमान शैक्षिक अवस्था, ग्लोबल सिटिजन र त्यसका लागि आवश्यक शिक्षाको बारेमा विभिन्न देशका शिक्षाविद्‌हरुले बहस चलाएर आयोजना भएको उक्त कार्यक्रममा होराइजन मावि सहभागी भएको विद्यालयका अतिरिक्त क्रियाकलाप इन्चार्ज नविन दाहालले जानकारी दिए ।

सोहि अवसरमा होटल पुत्र सनवे मलेसियामा आयोजित एक समारोहमा अमेरिकाको मेरील्याण्ड स्टेट विश्वविद्यालयले माविका प्रिन्सिपल संजिव राईलाई “डाक्टर अफ फिलोसोफी शिक्षा” को मानार्थ्य उपाधिबाट सम्मानित गरेको थियो । 

प्रिन्सिपल राई वि.स. २०७२ मा अन्तर्राष्ट्रिय साक्षारता दिवसको अवसरमा नेपाल सरकार शिक्षा मन्त्रालयबाट पनि सम्मानित भएको विद्यालयका शिक्षक महेश खड्काले जानकारी दिए ।