युनिलिभरको ३० औं वार्षिक साधारणसभा

विराटनगर : युनिलिभर नेपालको ३० औं वार्षिक साधारणसभा मंगलबार कम्पनीका अध्यक्ष देव बाजपेई र प्रबन्ध निर्देशक अम्लान मुखर्जीको उपस्थितिमा सम्पन्न भएको छ । 

युनिलिभर नेपाल लिमिटेडले अतुलनीय लाभांश प्रतिफल र कर पछिको नाफा १८३.४ करोड पुर्‍याएको छ । जुन गत वर्षको तुलनामा १९ प्रतिशतले बढी हो ।

युनिलिभर नेपालका शेयरधनीहरू यस वर्ष कम्पनीकै इतिहासमा सर्वाधिक धेरै लाभांश प्रतिशेयर १ हजार ५ सय ८० रुपैयाँका साथ लाभान्वित हुने भएका छन् ।

युनिलिभर नेपाल लिमिटेडले नेपालमा आफ्नो ३०औं वार्षिकोत्सव हरेक घरमा, हरेक मनमा भन्ने नाराका साथ मनाइरहेको छ । जसले नेपालका हरेक नेपालीको घरमा उनीहरूको प्रिय ब्राण्ड र उत्पादनको फराकिलो दायरा हुनुलाई प्रतिबिम्बित गर्ने कम्पनीको दावी छ ।

समारोहमा युनिलिभर नेपाल लिमिटेडका अध्यक्ष बाजपेईले सबै शेयरधनीहरू, नियामक निकायहरू, कर्मचारीहरू र अन्य सरोकारवालाहरूलाई धन्यवाद दिए ।

सोही समारोहमा युनिलिभर नेपाल लिमिटेडका प्रबन्ध निर्देशक अम्लान मुखर्जीले कर पश्चात् कम्पनीको खुद नाफा गतवर्षको रु.१५४.२ करोडबाट बढेर यो वर्ष १८३.४ करोड पुगेको जानकारी दिए ।

उक्त नाफा बितेको १० वर्षकै सबैभन्दा धेरै भएको उनले बताए । युनिलिभर नेपाल लिमिटेडको ८५ प्रतिशत शेयर संस्थापक शेयरधनीहरुको रहेको छ भने बाँकी १५ प्रतिशत शेयर सर्वसाधारणको रहेको छ ।