क्षयरोग निवारणमा अझै चुनौती

विराटनगर । नेपालमा ठूलो संख्यामा क्षयरोगका विरामी भएपनि पत्ता लाग्ने नसकेको बताइएको छ । ७१ औं राष्ट्रिय क्षयरोग नियन्त्रण दिवसको अवसरमा विराटनगरस्थित नेपाल क्षयरोग निवारण संस्थाले बिहीबार आयोजना गरेको कार्यक्रममा बोल्ने वक्ताहरूले यस्तो जानकारी दिएका हुन् ।

सो अवसरमा बोल्दै संस्थाका सभापति शिवनारायण प्रधानले गएको बर्ष नेपालमा ७० हजार क्षयरोगका विरामी भएको अनुमान गरिएकोमा ४० हजार ७ सय ७५ जनालाई मात्र उपचारको दायरमा ल्याउन सकिएको बताए । 

उनले क्षयरोगकै कारण देशभरीमा बर्सेनि १८ हजार मानिसको मृत्यु हुने गरेको समेत जानकारी दिए । यस्तै कोशी प्रदेशमा गएको बर्ष ४ हजार ८ सय विरामी र मोरङमा १ हजार ३ सय जनालाई मात्र उपचारको दायरामा ल्याउन सकिएको संस्थाले जनाएको छ । 

विराटनगर महानगरपालिकामा करिब ५ सय बिरामी उपचारको दायरमा आउनुपर्नेमा दुई सय ५० देखि तीनसय विरामी मात्र उपचारको दायरामा आउने र अन्यको पहिचान गर्न नसकिएकाले लुकीछिपी समुदायमैं बसेको जनाइएको छ ।

नेपालबाट विसं २१०७ सम्म क्षयरोग निर्मुल पार्ने लक्ष्य राखिएको भए पनि त्यसअनुरुपका कार्यक्रमहरु नल्याइएकाले लक्ष्य पूरा हुन चुनौती देखिएको कार्यक्रमका सहभागीहरुले बताएका थिए ।

विराटनगर महानगरपालिकाको स्वास्थ्य शाखाका दिलिप यादवले महानगरपालिकालाई टीबी फ्री (क्षयरोगमुक्त) पालिका बनाउन १९ वटै वडाबाट औषधि खुवाउने ब्यवस्थागर्न कार्य गरिरहेको बताए । 

नेपाल क्षयरोग निवारण संस्था विराटनगरले कोशी प्रदेशभित्र पहिचान हुने विरामीमध्ये २६ प्रतिशतको रोग निदानमा भूमिका निर्वाह गर्ने गरेको जनाइएको छ । 

यसवर्षको क्षयरोग दिवस क्षयरोगको सक्रिय खोज पडताल, क्षयरोग अन्त्यको आधार नारासहित मनाइएको छ । नेपाल विश्वमा जटिल खालको क्षयरोग हुनेमा ३० औं राष्ट्रमा पर्दछ ।