संसद्, न्यायालय र प्रेस बलियो बनाऔं : पुष्पा भुसाल

विराटनगर । नेपाली कांग्रेसकी उपसभापति पुष्पा भुसालले लोकतन्त्रलाई बलियो बनाउन मुलुकका संस्थाहरू बलियो बनाउनु पर्ने बताएकी छन् । त्यसका लागि संविधान, संसद्, न्यायपालिका र स्वतन्त्र प्रेसको संरक्षण अपरिहार्य रहेको बताएकी छन् । 

उद्घोष  दैनिकको २२ औँ वार्षिकोत्सव समारोहमा प्रमुख अतिथिका रूपमा बोल्दै भुसालले राजनीतिक दल र सञ्चारमाध्यमबीच लोकतन्त्रको संरक्षणका लागि सहकार्य आवश्यक रहेको बताइन् । 

‘जुन देशमा संसद् कमजोर हुन्छ, न्यायपालिका कमजोर हुन्छ र प्रेस कमजोर हुन्छ, त्यो देशको लोकतन्त्र टिक्न सक्दैन,’ उनले भनिन् । 

पछिल्लो राजनीतिक परिस्थितिप्रति चिन्ता व्यक्त गर्दै उनले जनताले स्थिर सरकारलाई दिएको मत सुशासन, समृद्धि र सुरक्षाको अपेक्षासहित आएको बताइन् । 

‘जनताले दिएको ठूलो मत केवल सरकार बनाउनका लागि होइन । त्यो मत सुशासन, भ्रष्टाचारमुक्त समाज, आर्थिक समृद्धि र सुरक्षाको अपेक्षासहित आएको हो,’ उनले भनिन् ‘तर पछिल्लो समय निजी क्षेत्रमाथि अनावश्यक दबाब दिने, प्रेसमाथिको भयको वातावरण लोकतान्त्रिक अभ्यासका लागि राम्रो संकेत होइन ।’ 

उनले राजनीतिक दलहरू मिलेर संविधान र लोकतान्त्रिक उपलब्धिको रक्षा गर्नुपर्ने पनि उल्लेख गरिन् । 

‘भोलिको पुस्ताले फेरि सडकमा आएर लोकतन्त्र बचाउनुपर्ने अवस्था आउनु हुँदैन,’ उनको भनाइ थियो ।