एक मार्गदर्शकको रूपमा मेरो यात्रा

जीवनमा सिकाइ कहिल्यै रोकिंदैन  । हरेक भेट, हरेक संवाद र हरेक अनुभवले केही न केही नयाँ कुरा सिकाउँछ  । मेरो लागि मार्गदर्शन  (मेन्टोरिङ) त्यही निरन्तर सिकाइ र साझा यात्राको एउटा महत्वपूर्ण हिस्सा हो ।

मार्गदर्शन  केवल सल्लाह दिने वा निर्देशन गर्ने कार्य होइन, यो परस्पर बुझाइ, सहानुभूति र प्रेरणाको सुन्दर सेतु हो, जसले दुवै मागदर्शक र प्रशिक्षार्थीलाई आत्मविकासतर्फ अग्रसर गराउँछ ।
 

डब्लूओडब्लू (वाउ) महोत्सव  :  प्रेरणा र सम्भावनाको संगम
गत वर्ष, मलाई एउटा अद्भूत अवसर प्राप्त भयो, विश्व महिला सम्मेलन नेपाल ( वुमन अफ द वल्र्ड फेस्टिभल नेपाल) मा परामर्शदाताको रूपमा सहभागी हुने । यो कार्यक्रम ब्रिटिश काउन्सिल र काठमाडौं महानगरपालिकाको सहकार्यमा आयोजना गरिएको थियो । विशेष गरी द्रुत मार्गदर्शन सत्रहरू  (स्पिड मेन्टोरिङ सेसन्स), जुन ‘वुमेन लिड नेपाल’ नामक  संस्थाले संयोजन गरेको थियो, त्यो मञ्च मेरा लागि अत्यन्तै प्रेरणादायी र आत्मीय अनुभव रह्यो ।

यो कार्यक्रम काठमाडौंको नक्सालचौरमा सम्पन्न भएको थियो, जहाँ दुई दिनका लागि विभिन्न क्षेत्रका अनुभवी महिला परामर्शदाताहरू र उत्साही प्रशिक्षार्थीहरू एकत्रित भएका थिए । वातावरणमा ऊर्जा, सकारात्मकता, र प्रेरणाको अद्भूत तरङ्ग फैलिएको थियो ।

विविध पृष्ठभूमिका प्रशिक्षार्थीहरूसँगको आत्मीय भेट
मार्गदर्शन सत्रमा विभिन्न पृष्ठभूमिबाट आएका प्रशिक्षार्थीहरूसँग भेट्ने मौका मिल्यो । कसैले उद्यमशीलताको यात्रामा पहिलो पाइला चालेका थिए, कसैले आफ्नो पेशागत मार्गमा स्पष्टता खोज्दै थिए, कसैले आत्मविश्वास पुनर्निर्माण गर्न चाहन्थे, र कसैले आफ्नो पहिचान र लक्ष्यस“ग गहिरो सम्बन्ध खोज्दै थिए ।

त्यहाँ स्नातक विद्यार्थीहरू, विद्यालयका शिक्षकहरू, स्टार्टअप उद्यमीहरू, र तेस्रो लिङ्ग समुदायका प्रतिनिधिहरू थिए — सबैसँग आफ्ना फरक तर समान उद्देश्यहरू थिएः आफ्नो सपना साकार पार्ने चाहना ।

उनीहरूका कथा सुन्दा, मैले महसुस गरें कि प्रत्येक व्यक्तिमा एउटा सम्भावनाको उज्यालो छ, जुन कहिलेकाहीं आत्मसन्देह वा अवसरको अभावले हराएको हुन्छ । मार्गदर्शकको रूपमा मेरो भूमिका त्यो उज्यालोलाई फेरि प्रज्वलित गर्ने थियो — सहानुभूति, सुझाव र प्रेरणाका माध्यमबाट । 

संवादको शक्ति
मार्गदर्शन केवल एकतर्फी सिकाइ होइन । हरेक संवादले पनि नयाँ कुरा सिकायो । जब  उनीहरूका सपना, चुनौती र दृष्टिकोण सुन्दै थिएँ, आफ्नै यात्राको प्रतिबिम्ब देख्थें । उनीहरूको जिज्ञासाले मलाई सोच्न बाध्य पाथ्र्यो– हामी कति फरक तर कति समान यात्रामा छौं । उनीहरूका प्रश्नहरूले मलाई पनि आफ्ना उत्तरहरू पुनः खोज्न सिकाए ।

त्यो क्षणमा मैले महसुस गरें,  मार्गदर्शन भनेको सल्लाह दिने होइन, सम्भावनाको ढोका खोल्ने प्रक्रिया हो । यो आत्मविश्वास जगाउने, दिशानिर्देशन दिने र प्रेरणाको बीज रोप्ने कला हो ।

डब्लूओडब्लू (वाउ) महोत्सवको आत्मिक अर्थ
डब्लूओडब्लू (वाउ) महोत्सव  केवल एउटा कार्यक्रम थिएन, यो महिला सशक्तीकरण, आत्मविश्वास र सहकार्यको प्रतीक थियो । यसले विभिन्न पृष्ठभूमिका महिलाहरूलाई एउटै मञ्चमा ल्यायो, जहा“ उनीहरूले आफ्ना कथा बाँडे, सीप प्रदर्शन गरे, र आत्मविकासको यात्रा आरम्भ गरे ।

ई दिनको त्यो सत्रमा मैले अनुभव गरें — जब महिलाहरू आपसमा संवाद गर्छन्, समर्थन गर्छन् र सिक्छन्, तब सामाजिक परिवर्तनको लहर उत्पन्न हुन्छ । मार्गदर्शनको माध्यमबाट हामी केवल व्यक्तिगत स्तरमा होइन, सामूहिक रूपमा पनि अघि बढ्छौं ।
 

आत्मसन्तुष्टि र प्रतिबद्धताको अनुभव
ती दुई दिनका अनुभवहरूले आफूलाई गहिरो आत्मसन्तुष्टि दियो । मार्गदर्शन सत्रपछि धेरै प्रशिक्षार्थीहरूले कृतज्ञता व्यक्त गरे, र उनीहरूको आँखामा आशाको चमक देख्दा मेरो मन गद्गद् भयो । त्यो चमक केवल धन्यवादको प्रतीक थिएन, त्यो आत्मविश्वासको पुनर्जन्म थियो ।

मार्गदर्शनले  सिकायो कि सशक्तीकरण भनेको अरूलाई अघि बढ्न प्रोत्साहन दिनु हो, र जब हामी अरूलाई उज्यालो देखाउँछौं, त्यो उज्यालो आफूभित्र पनि झल्किन्छ ।

मेरो लागि, विश्व महिला सम्मेलन नेपाल ( वुमन अफ द वल्र्ड फेस्टिभल नेपाल) मा मार्गदर्शक (मेन्टोर) को रूपमा सहभागिता केवल पेशागत अवसर थिएन यो जीवन, नेतृत्व र सहानुभूतिको पाठ थियो । यसले मेरो विश्वासलाई अझ मजबुत बनायो कि मार्गदर्शन भनेको सिक्ने, बाँड्ने र सँगै बढ्ने यात्रा हो ।

आज पनि जब म त्यो क्षण सम्झन्छु, उत्साहित अनुहारहरू, सपनाले भरिएका कुरा र सकारात्मक ऊर्जा । मलाई लाग्छ त्यो दुई दिनले मेरो जीवनमा एउटा नयाँ अध्याय लेख्यो । त्यो अध्याय जसले मलाई अझ दृढ, संवेदनशील र प्रेरणादायी बनायो ।

साँचो अर्थमा भन्नुपर्दा, एक मार्गदर्शकको रूपमा मेरो यात्रा केवल भूमिका होइन, त्यो मेरो जीवनदर्शन हो ।

डब्लूओडब्लू (वाउ) महोत्सवको अनुभवले मलाई सिकायो, जब हामी अरूलाई सशक्त बनाउँछौं, तब हामी आफैं पनि नयाँ रूपमा पुनर्जन्म लिन्छौं ।