चार लाख २७ हजार रुपैयाँभन्दा बढीका अवैध सामान बरामद, एक जना पक्राउ

विराटनगर । मोरङ जिल्लाका विभिन्न स्थानबाट सशस्त्र प्रहरी बल नेपालले चार लाख २७ हजार ३९० रुपैयाँ बराबरका अवैध सामान बरामद गरेको छ ।

अवैध सामान ओसारपसारमा संलग्न रहेको आरोपमा एक जनालाई समेत नियन्त्रणमा लिइएको छ । 

सशस्त्र प्रहरी बल नेपाल नं. ३ गण हेडक्वार्टर कंकालिनी तथा मातहतका सीमा सुरक्षा गुल्म रानी र बीओपी जहदा भुटाहाबाट खटिएको टोलीले शुक्रबार उक्त सामान बरामद गरेको हो ।

बरामद गरिएका सामानमा एक थान मोटरसाइकल, दुई थान रिक्सा, रजनीगन्धा, लत्ताकपडा, औषधि, हार्डवेयर तथा किराना सामान रहेका छन् ।

सशस्त्र प्रहरीले अवैध सामान ओसारपसारमा संलग्न रहेको आरोपमा मोरङको विराटनगर महानगरपालिका–१४ निवासी २३ वर्षीय विपिन यादवलाई समेत नियन्त्रणमा लिएको जनाएको छ ।

बरामद सामान र यादवलाई आवश्यक कानुनी कारबाहीका लागि विराटनगर भन्सार कार्यालयमा बुझाइएको सशस्त्र प्रहरीले जनाएको छ ।