Biratnagar, Morang, Nepal
२१ चैत २०८१, बिहिवार
+977 21 450305, 515728, 578305
समाज

एभरेष्ट माविमा खेलकुद सप्ताह सुरु, उद्घाटन भव्य (फोटो)

उद्‌घोष सम्वाददाता
६ माघ २०८१, आइतवार

विराटनगर । विराटनगर–५ स्थित एभरेष्ट स्कुलले विद्यार्थीहरूलाई सहभागी गराउँदै खेलकुद सप्ताह आयोजना गरेको छ । खेलकुद सप्ताहमा विद्यालयमा अध्ययनरत कक्षा नर्सरीदेखि ९ सम्मका एक हजार पाँच सय विद्यार्थीहरूले सहभागीता जनाएका छन् ।

खेलकुद सप्ताहको उद्घाटन गर्दै विराटनगर महानगरपालिकाका मेयर नागेश कोइरालाले एभरेष्ट स्कुल जस्ता विद्यालयका कारण विराटनगर शैक्षिक हब बनेको बताए । उनले एभरेष्ट स्कुलले दिएको शैक्षिक वातावरण अन्तर्राष्ट्रिय स्तरको भएका कारण अधिकांश अभिभावक र विद्यार्थीको रोजाई बन्न पुगेको उल्लेख गरे । 

विद्यालयका अध्यक्ष विनोद ढकालले विद्यालय स्थापनाको ३१ औं वर्ष पूरा भएको भन्दै सम्पूर्ण अभिभावक तथा सरोकारवालाको विश्वासले एभरेष्ट स्कुलले देशकै उत्कृष्ट विद्यालयहरू मध्ये एक हुन सकेको बताए ।

विद्यालयका प्रिन्सिपल टिकाराम पुरीले अन्तर्राष्ट्रियस्तरको शिक्षा विराटनगरमै प्रदान गर्ने आफूहरुको उद्देश्य रहेको बताए । सोही कारण एभरेष्टले शैक्षिक क्षेत्रमा उत्कृष्ट नजिता प्राप्त गरेकै कारण पटक–पटक सरकारबाट राष्ट्रिय तथा क्षेत्रीय पुरस्कार र विभिन्न संघसंस्थाबाट सम्मान प्राप्त गरेको दाबी गरे । 

‘एउटा विश्वस्तरीय शैक्षिक संस्थामा हुने सम्पूर्ण वातावरण हामी हाम्रो विद्यालयमा होस् भन्ने चाहन्छौं, त्यसका लागि हामी प्रयत्नशिल छौं, चाहे त्यो शैक्षिक वातावरणका लागि होस् चाहे सर्वाङ्गीण विकासका लागि’ पुरीले भने– ‘विद्यालयमा हरेक दिनजसो नयाँ–नयाँ विषयहरू अवलम्बन गर्दै आएका छौं, युग सापेक्ष कम्प्युटरको ज्ञान होस्, या बेलायतको कोर्ष डीजी स्कुलसँगको सहकार्य होस्, भारतको नयाँ दिल्लीमा सफल अभ्यास गरेको ह्याप्पिनेश करिकुलम नै किन नहोस्, विद्यालयले आफ्ना विद्यार्थीलाई नैतिकवान बनाउन आफ्नै पाठ्यक्रमदेखि अन्वेषण तथा आविष्कारमा लगाउने कारखानासँग सहकार्य गर्दै आएका छौं ।’

प्रिन्सिपल पुरीले यसका अलवा अतिरिक्त कृयाकलाप अन्तरगत खेलकुद क्षेत्रहरूमा प्रशिक्षकबाट नियमित प्रशिक्षण गराउँदै आएको बताए । नियमित प्रशिक्षणकै कारण विद्यालयले ठुलो कार्यक्रमका साथ खेलकुद सप्ताह आयोजना गर्न सफल भएको दाबी गरे ।

उक्त अवसरमा राष्ट्रिय परिक्षा बोर्ड कोशी प्रदेशका प्रमुख दामोदर गुरागाईं, शिक्षा विकास तथा समन्वय इकाई मोरङका प्रमुख जीवन गड्तौला, विराटनगर महानगरपालिकाका शिक्षा महाशाखा प्रमुख रामप्रसाद पाण्डे, प्याब्सन केन्द्रीय उपाध्यक्ष राजेशकुमार दास, प्याब्सन विराटनगर महानगरका अध्यक्ष अर्जुन श्रेष्ठ लगायतको उपस्थिति रहेको थियो ।

खेलकुद सप्ताहको उद्घाटनका अवसरमा विद्यार्थीहरूले विभिन्न खेल कौशल प्रस्तुत गरेका थिए । साथै गीत संगीत र नृत्य, स्काउटको मार्चपास, तेक्वान्दो र कराँतेका विभिन्न कौसलले उपस्थित अभिभावक र विद्यार्थीहरूको ध्यान आकृष्ट गराएको थियो ।

View : 236

Copyright © 2023 -2025. Udghosh Daily. All Rights Reserved