कोशी प्रदेश सभाको नयाँ सभा हलमा बस्यो पहिलो बैठक (तस्वीरहरू)

विराटनगर । मोरङको कटहरी–१ मा बनेको कोशी प्रदेश सभाको नयाँ प्रदेश सभा हलमा बुधबार पहिलो बैठक बसेको छ ।

देवकोटा चोकस्थित प्रदेश सभा सचिवालय र सभा हल गत भदौ २४ मा जेनजी आन्दोलनका क्रममा तोडफोड र आगजनीबाट ध्वस्त बनेको थियो ।

त्यसपछि कटहरीस्थित फलफूल तथा तरकारी थोक तथा खुद्रा बजारको भवन संरचनामा सरेको प्रदेश सभा सचिवालयले सोही स्थानमा नयाँ सभा हल निर्माण सम्पन्न गरेपछि बुधबार पहिलो बैठक बसेको हो ।

यसअघि प्रदेश सभा सचिवालयले विराटनगर महानगरपालिकाको वीरेन्द्र सभागृह भाडामा लिएर बैठक संचालन गरेको थियो ।

बुधबारदेखि सभा हल प्रयोगमा आएको छ । सभा हलसहित दलको कार्यालय, बैठक हल लगायतका अन्य संरचना पनि तयार भएको प्रदेश सभा सचिवालयका सचिव सुदर्शन खड्काले बताए ।