धनकुटाको हुलाकटोलमा ढोका फुटाएर सुन पसल चोरी

धनकुटा, ८ पुस । धनकुटा बजारको सुन पसलमा गएराती चोरी भएको छ । धनकुटा नगरपालिका– ७ हुलाकटोलस्थित जिल्ला अस्पताल अगाडि रहेको जिमी ज्वेलर्समा चोरी भएको जनाइएको छ ।

पसल पछाडिको ढोका फुटाएर चोरी भएको पसल सञ्चालक सन्दिप पण्डितले बताए ।

उनका अनुसार करिब आधा तोला सुन र १० किलो चाँदी चोरी भएको जनाइएको छ । ‘सेफ’ मा राखिएको सुन भने जोगिएको पण्डितले बताए । 

‘सेफ फोड्ने कोसिस गरेछ, नसकेकाले त्यहाँ भएको सुन चैं जोगियो’ सञ्चालक पण्डितले भने, ‘सेफ बाहिर पसलमा भएको सबै सुन चाँदी लगेछ ।’

पसलभित्र बेग्लै ठाउँमा सुरक्षित गरी राखिएको हुनाले थप सुन चोरी हुनबाट जोगिएको जनाइएको छ । बिहान पसल खोल्न पुग्दा चोरी भएको थाहा भएको उनले जानकारी दिए । 

पसल चोरीको जानकारी पाएपछि घटनाको विषयमा थप अनुसन्धान अघि बढाएको धनकुटाका प्रहरी प्रवक्ता डीएसपी राजबाबु महर्जनले जानकारी दिए ।