आयोजक धरान फुटबल क्लबलाई पराजित गर्दै एन्फा मोरङ उपाधि नजिक

सुनसरी । आयोजक धरान फुटबल क्लबलाई पराजित गर्दै एन्फा मोरङ २४ औं संस्करणको अन्तर्राष्ट्रिय आमन्त्रण बुढासुब्बा गोल्डकपको फाइनलमा प्रवेश गरेको छ । 

धरान रंगशालामा बुधबार भएको पहिलो सेमिफाइनलमा आयोजक धरान फुटबल क्लबलाई पेनाल्टी सुटआउटमा ५–४ गोल अन्तरले पराजित गर्दै एन्फा मोरङ उपाधी नजिक पुगेको हो । 

निर्धारित ९० मिनेटको खेलमा दुबै टिमले गोलरहित बराबरी खेलेका थिए । पेनाल्टीमा धरानका मिलन राईको प्रहार मोरङका गोलकिपर पूर्ण चेम्जोङले रोकपछि आयोजक धरान पराजित भएको हो । 

धरानका दोर्जे तामाङ, विजय राई, अनिल राई र सुगम जीमीले मात्र गोल गरे । मोरङको तर्फबाट अशोक खवास, धिरेन क्षेत्री, साइमन लिम्बु, आदित्य शाक्य र सागर तिवारीसहित पाँचै जनाको प्रहार गोलमा परिणत भएको थियो । 

खेलको म्यान अफद म्याच मोरङका गोलकिपर पूर्ण चेम्जोङ घोषित भए । उनले नगद १० हजार पाए । यसअधि निर्धारित समयमा भने दुबै टिमले आक्रामक खेल स्तुत गर्न सकेनन् । 

खेलको ३२ औं मिनेटमा धरानका प्रविण भुजेलले मोरङका भुवन बस्नेतलाई खराब ट्याकल गरेपछि दोहोरो पहेलो कार्ड पश्चातको रेड कार्ड पाएर मैदान बाहिरिए ।

१० खेलडीमा सिमित धरानमाथि बाँकी समय मोरङले गोल गर्न नसक्दा नतिजाका लागि पेनाल्टी सुटआउटसम्म कुर्नु परेको थियो । 

धरानले पनि खेलको ६०औं मिनेटमा पाएको अवसर खेर फाल्यो । बिनोद राई वान भर्सेज वानमा पनि गोल गर्न चुके । उनको प्रहार गोलकिपर पूर्णले रोकेका थिए ।

बिहीबारको अन्तिम सेमिफाइनल खेल काँकडभिट्टा फुटबल ट्रेनिङ सेन्टर झापा र न्युरोड टिम एनआरटीबिच हुनेछ । शनिबार हुने फाइनल बिजेताले उपाधिसँगै १० लाख रुपैयाँ तथा उपविजेताले ५ लाख रुपैयाँ पुरस्कार प्राप्त गर्ने आयोजकले घोषणा गरिसकेको छ ।