माघ २२ देखि पाठेघरको क्यान्सरविरुद्धको खोप अभियान

विराटनगर । कोशी प्रदेशका २ लाख ६५ हजार किशोरीहरूलाई पाठेघरको क्यान्सरको विरुद्धमा लगाइने एचपीभी (ह्युमन प्यापिलोमा भाइरस) खोप लगाउने अभियान सुरु हुने भएको छ । 

माघ २२ गतेदेखि खोप अभियानको थालनी गरी फागुन ७ गतेसम्म लगाइने प्रदेश स्वास्थ्य निर्देशनालयले जनाएको छ ।

नेपाल लगायतका देशमा महिलाको मृत्युको ठुलो कारण बन्दै गएको पाठेघरको मुखको क्यान्सरलाई रोक्नका लागि खोप अभियान सुरु गरिने निर्देशनालयका खोप अधिकृत भरत भण्डारीले बताए । 

स्वास्थ्य मन्त्रालयमा आयोजित अभिमुखीकरण कार्यक्रममा अधिकृत भण्डारीले कक्षा ६ देखि १० सम्मका छात्राहरू २ लाख २० हजार ५८४ जना र विद्यालय नजाने १० देखि १४ वर्ष उमेरका करिव ४५ हजार किशोरीहरूलाई खोप अभियानमा समेटिने बताए । खोप अभियानका लागि कोशी प्रदेशका सबै जिल्लामा खोप पुगिसकेको जनाइएको छ ।

पाठेघरको मुखको क्यान्सरलाई नेपालमा महिलाहरूको मृत्युदर ठुलो भएको रोग मानिएको छ । विश्वभर यो रोगबाट पीडित भएका महिलाहरूमध्ये नेपालजस्ता कम विकसित देशमा ९० प्रतिशत महिला रहेको जनाइएको छ ।

खोप अधिकृत भण्डारीले महिलालाई लाग्ने क्यान्सर मध्ये सबैभन्दा धेरै मृत्युको कारण नै पाठेघरको क्यान्सर भएको बताए । त्यही भएर सरकारले सन् २०३० भित्र नेपालबाट पाठेघरको क्यान्सर निवारण गर्ने लक्ष्य लिएको जनाइएको छ ।

पाठेघरको क्यान्सरको फैलावट रोक्नका लागि ३० देखि ४९ वर्षका महिलाहरूको एचपीपी भाइरस जाँचको कार्य थप चुनौतीपूर्ण बनेको हो । पाठेघरको मुखको क्यान्सरबाट नेपालमा हरेक दिन ४ जना महिलाहरूको मृत्यु हुने गरेको जनाइएको छ ।

सरकारले सुरु गर्ने खोप अभियानलाई सफल बनाउन प्रत्येक व्यक्तिले जिम्मेवारी बहन गर्नुपर्ने कोशी प्रदेश स्वास्थ्य मन्त्रालयकी सचिव डा. राधिका थपलियाले बताइन् ।

कार्यक्रममा जिल्ला समन्वय समिति मोरङका प्रमुख अजम्बर राई, प्रदेश स्वास्थ्य निर्देशनालय धनकुटाका निर्देशक ज्ञानबहादुर बस्नेत लगायत मन्त्रालयका कर्मचारी, सञ्चारकर्मी, सामुदायिक र संस्थागत विद्यालयका प्रतिनिधिहरूको सहभागिता रहेको थियो ।