आगोले दुई घर र एउटा गोठमा क्षति

धनकुटा : धनकुटाको कर्मिटारमा आइतबार दिउँसो आगलागी हुँदा दुईवटा घर र एउटा गोठमा क्षति पुगेको छ । आगोले स्थानीय विश्ववन्धु थापाको घर र गोठ तथा काजीनारायण खड्काको घरमा क्षति पुगेको हो ।

आगोले विश्ववन्धुको घरसहित घरभित्र रहेका खाद्यान्न, लत्ताकपडा, भाँडा लगायत सामान जलेर नष्ट भएका छन् । गोठमा रहेका दुईवटा खसी र १८० वटा कुखुरा पनि जलेका छन् ।

काजी नारायणको घरमा पनि आंशिक क्षति पुगेको छ । घरभित्र रहेको टिभीसहित लत्ताकपडा जलेर नष्ट भएका छन् । आगलागीबाट करिब ११ लाख बराबरको क्षति भएको अनुमान गरिएको प्रहरी निरीक्षक होम अधिकारीले जानकारी दिए ।

विश्वबन्धुको घरसँगै रहेको गोठमा खोले पकाउने क्रममा आगो सल्किएको हो । धनकुटा नगरपालिकाको दमकलको सहायतामा प्रहरी र स्थानीयवासीले करिब एक घण्टापछि आगो नियन्त्रणमा लिएका थिए ।