विराटनगर फुटसल : स्टार ब्वाइज एफसी फाइनलमा प्रवेश

विराटनगर । विराटनगर फुटसल लिगको सोमबार सम्पन्न दशौं चरणको खेलमा स्टार ब्वाइज एफसी अपटाउन एफसीलाई ४–१ ले पराजित गर्दै फाइनलमा प्रवेश गरेको छ । स्टार ब्वाइज एफसीले अब फाइनलमा एबी ५ एफसीको सामना गर्नेछ ।

स्थानीय फुटबलको विकासलाई गति दिन विराटनगर सिटी फुटबल क्लबको आयोजनामा विराटनगर फुटसल लिग भइरहेकोमा अब अन्तिम चरणमा उपाधिका लागि फाइनल र तेस्रोको लागि खेल मात्र हुन बाँकी छ ।

प्रतियोगिता विराटनगर मधुमारा भीआईपी रोडमा रहेको ज्याम्बोरी नेक्सस लाउन्ज(जेएनएल) मा भइरहेको छ । आयोजकका अनुसार बिजेता टिमले ४० हजार र उपबिजेता २० हजारले पाउने छन् । 

प्रतियोगितामा विराटनगरका विभिन्न ६ वटा क्लब सहभागी थिए । 

विराटनगरमा फुटबलको व्यवसायिक खेल सुरु होस् भन्ने उद्देश्यले प्रतियोगिताको आयोजना गरिएको अयोजक विराटनगर सिटी फुटबल क्लब कार्यकारी निर्देशक शुभाशीष कोइरालाले बताएका छन् ।