एमाले– माओवादीबीच एक घण्टा छलफल, प्रदेश प्रमुखसँग परामर्शमा

विराटनगर । कोशी प्रदेशका मुख्यमन्त्री केदार कार्कीले विश्वासको मत लिने समय घर्काएर राजिनामा समेत नदिई बसेपछि नेकपा एमाले र माओवादी केन्द्रका प्रदेश स्तरीय शीर्ष नेताहरूले छलफल गरेका छन् । विराटनगरको बिग होटलमा उनीहरूबीच एक घण्टा गम्भीर छलफल भएको जनाइएको छ ।

छलफलमा नेकपा एमाले संसदीय दलका नेता हिक्मतकुमार कार्की, उपनेता राम राना, प्रमुख सचेतक रेवतिरमण भण्डारी तथा माओवादी संसदीय दलका नेता इन्द्रबहादुर आङ्बो र प्रदेश सांसद जीवन आचार्यबीच छलफल भएको हो ।

छलफल सकेर उनीहरु प्रदेश प्रमुख परशुराम खापुङ्गसँग नयाँ सरकार गठनको प्रक्रियाका बारेमा परामर्शका लागि पुगेका हुन् ।

दलका नेताहरूले मुख्यमन्त्री कार्कीले संविधानको धारा १८८ को उपधारा (२) बमोजिम प्रदेशसभाबाट विश्वासको मत पनि नलिएको र राजिनामा पनि नदिएका कारण संसदबाट पारित भएको संकल्प प्रस्तावको निर्देशन अनुसार नयाँ सरकार गठनको प्रक्रिया प्रारम्भ गर्न आग्रह गर्दै आएका छन् ।

मुख्यमन्त्री केदार कार्कीले प्रदेश सभाबाट विश्वासको मत लिने ३० दिनको समय मंगलबार राती १२ बजेसम्म मात्रै थियो । उनले राजिनामा समेत नदिएपछि एमाले– माओवादी समीकरणमा शीर्ष नेताहरू छलफलमा जुटेका हुन् ।