दुई विद्यार्थी सम्मानित

विराटनगर । मोरङको कटहरी गाउँपालिका–४ नयाँबजारस्थित विकास पोद्दार स्मृति परिषद्ले जेहन्दार तथा गरिव दुई विद्यार्थीलाई छात्रवृत्तिसहित सम्मानित गरेको छ । 

सम्मानित हुनेहरूमा सेन्ट जोसेफ माध्यमिक विद्यालय विराटनगरका विनम्र घिमिरे र कटहरी–४ स्थित भगवती आधारभूत विद्यालयकी छात्रा आरुसी कामत  छन् । उनीहरूलाई नगद २१ हजार र ११ हजार तथा सम्मान पत्र प्रदान गरिएको जनाइएको छ ।

विकास पोद्दार स्मृति परिषद्का संरक्षक देवानन्द पोद्दार, कटहरी–४ का वडाध्यक्ष जीवेश्वर यादव, डा रामलाल सुतिहार, डा प्रतिभा मण्डल, विष्णुदेव मण्डल लगायतले सम्मानित विद्यार्थीहरूलाई नगदसहितको सम्मान पत्र प्रदान गरेका हुन् ।

जर्मनमा अध्ययनका क्रममा निमोनियाबाट मृत्यु हुन पुगेका स्वर्गीय विकास पोद्दारको स्मृतिमा हरेक बर्ष दुईजना जेहेन्दार एवं गरिव विद्यार्थीलाई छात्रवृत्ति र सम्मान कार्यक्रम गरिंदै आएको परिवारका सदस्यले बताएका छन् ।