उपसभामुख दनुवारद्वारा महिला फुटबल खेलाडी सम्मानित

विराटनगर । कोशी प्रदेश सभाकी उपसभामुख सिर्जना दनुवारले गृहजिल्लाका दुई महिला फुटबल खेलाडीहरूलाई सम्मानित गरेकी छन् ।

नेपाली राष्ट्रिय महिला खेलाडी अमिसा कार्की र सविता राना मगरलाई सम्मानित गरेकी छन् । साफ महिला च्याम्पियनशीपमा उत्कृष्ट प्रदर्शन गरेका उदयपुरका महिला फुटबलर कार्की र मगरलाई उनले सम्मानपत्र, दोसल्ला र नगद प्रदान गरेकी हुन् ।

शनिबार उपसभामुख दनुवारले सदरमुकाम गाईघाटमा खेलाडी कार्कीलाई सम्मान गरिन् । कार्की उदयपुरकै त्रियुगा नगरपालिका–५ की हुन् । त्यस्तै अर्की खेलाडी मगरलाई कोशी प्रदेश सभास्थित आफ्नै कार्यकक्षमा सम्मानित गरेकी हुन् ।

उपसभामुख दनुवारले सरकारका तीनै तहले खेलाडीहरूलाई निरन्तर प्रोत्साहन गर्नुपर्ने बताइन् । प्रोत्साहनबाट मात्रै खेलाडीहरूमा हौसला प्राप्त भई आगामी खेल अझ बलियो प्रदर्शन गर्न मद्दत पुग्ने बताइन् । 

कार्यक्रममा उदयपुरका प्रमुख जिल्ला अधिकारी हरिप्रसाद घिमिरे, त्रियुगा नगरपालिकाकी उपमेयर महेश्वरी राई लगायतले उदयपुर जिल्लाले नै उत्कृष्ट खेलाडीहरू उत्पादन गर्न सफल भएको बताए । 

राष्ट्रिय महिला फुटबल टोलीबाट खेल्दै आएका कार्की र राना मगरलाई बिहीबार मात्रै नेकपा एमाले उदयपुरले जनही १५ हजार रुपैयाँसहित गाइघाट बजार परिक्रमा गराएर सम्मान गरेको थियो । 

त्यस्तै त्रियुगा नगरपालिकाले अमिसालाई ५० हजार रुपैयाँसहित सम्मानित गरेको थियो ।