न्यूरोमा एमडी र एमएसको पढाइ सुरु

विराटनगर । विराटनगरस्थित न्यूरो अस्पतालले एमडी र एमएस पढ्न चाहनेहरूको लागि डिजाइन गरिएको फेलोशिपअफ द कलेज अफ फिजिसियन एन्ड सर्जन्स कार्यक्रमको सुरुवात गरेको छ । 

हालै शुरु गरिएको कार्यक्रममा सामान्य चिकित्सा, सामान्य शल्यक्रिया, अर्थोपेडिक सर्जरी, न्यूरो सर्जरी र कार्डियोलोजी समावेश रहेको र थप विधाहरु थप्दै जाने अस्पतालले जनाएको छ । 

अस्पतालका अध्यक्ष डा. वीरेन्द्रकुमार बिष्ट र अस्पतालका एकेडेमिक डाइरेक्टर प्राडा नवीनकुमार कर्णले कार्यक्रमको पहिलो विद्यार्थी डा सञ्जय यादवलाई स्वागत गरेका छन् ।

स्वागत कार्यक्रममा बोल्दै उनले यो नयाँ पहल चिकित्सा शिक्षा र स्वास्थ्य सेवा मापदण्डहरू सुधार गर्दै उत्कृष्ट स्वास्थ्य सेवा प्रदान गर्ने प्रतिबद्धता व्यक्त गरे । 

सो कार्यक्रमले विभिन्न चिकित्सकीय विधाहरुमा बिशेष प्रशिक्षण, व्यावहारिक ज्ञान र अनुभव प्रदान गर्दछ, जसले गर्दा चिकित्सकहरुलाई बिरामीहरुको हेरचाह र उपचार प्रदान गर्न चाहिने नवीनतम ज्ञान र सीपहरूको विकास गर्छ, डा कर्णले भने ।

त्यसैगरि डा बिष्टले सो कार्यक्रम अस्पतालको यात्रामा एक महत्वपूर्ण कोशेढुंगा भएको दावी गर्दै २४ बर्षदेखि स्वास्थोपचारमा संलग्न हाम्रो अनुभव आउने पिंढीका चिकित्सकहरुको लागि राम्रो मार्ग दर्शन हुने बताए । 

न्यूरो कार्डियो एण्ड मल्टिस्पेशियालिटी हस्पिटलको एकेडेमिक कार्यक्रम अन्तर्गत स्टाफ नर्स तथा एचएको पढाइ  विगत १४ बर्षदेखि सञ्चालनमा रहेको छ ।